((((( حبيت خشـمه واقبل الدمع سـكاااب )))))

امل من الاداره حفظها الله التثبيت وشكرا
اسعد الله اوقاتكم بكل خير

هذه رساله من الشاعر الكبير / جوهر بن غالب الحربي ..

قرأتها فأعجبتني واحببت ان انقلها لكم .. وتستمتعوا بقرائتها ..
وشاعرنا وصف الشعر بعود كبير بالسن ومنوم بالمستشفي ويه مغذي ومنصاب وودوه شهار وحاله يرثالها ؟؟؟؟؟وفقد شعار وطبعا استثنى بعض الشعار اللذين لهم ثقلهم بالساحه الشعريه وبدون ذكر اسما

صدفه لقيت الشعر في قسم الأعصاب// يبـي يشـق الثـوب ومحجزيـنـه

وأسمع وراه بغرفته صوت وطـلاب // أحد(ن) يبي يحماه وأحـد(ن) يدينـه

وسئلت عنه أهل العنايـه والأطبـاب // وش صاب حال العود يـا معالجينـه

قالوا مريض ودخّل أشهار منصـاب // والظاهـر انـه مقفيات(ن)سنيـنـه

قلت أبا زوره عجلـوا فكـوا البـاب // قالوا مريض ويزعجـك فـي ونينـه

قلت أن هجرته عمد يلحقني أعتـاب // تكفـون لا تقفـون بينـي وبيـنـه

قالوا تفضـل دون تقييـد وحسـاب // لو كان حـال العـود ماهـي بزينـه

وجيته وهو من ضجة الناس مرتـاب // وقام وتنهض فـي وقـار وسكينـه

عليه مـن لبـس العيـادات جلبـاب // وسلك المغـذي رابطـه فـي يمينـه

وحبيت خشمه وأقبل الدمـع سكـاب // وأبطـى يطالعنـي بعين(ن)حزيـنـه

جسمه نحيف ولحيتـه كلهـا تـراب // وبعض الكوايا واسمـات(ن) جبينـه

معروف ما بين القرايـب والأجنـاب // شكل بدوي معـروف ملـه وطينـه

قلت انت وشلونك عسى ما بك أسباب // وقـام يتلقـف عبرتـه فـي يدينـه

قلت أنت لا تبكي ترى عندك أقـراب // قرابـة المولـود مــن والديـنـه

ومش الدموع وقال ويش أنت يا شاب // فـلان وبـن فـلان وفـلان وينـه

ناس(ن) ثنوا من دون حقي ولاغاب // يـوم إنهـم حيـيـن متوارثيـنـه

متوارثين الصيت والصيت ما خـاب // ياطيـب صيتـي عندهـم حافظينـه

حامينني من كـل جاهـل وغصـاب // مـن مـد كفـه للعبـث خاصمينـه

واليوم شـوّه سمعتـي كـل مغتـاب // يلعب على الحبلين محـد(ن) يهينـه

إلاّ قليل(ن) من كثير العـرب طـاب // تالي رجايـه عقـب ذقـت الغبينـه

لعلهـم يبنـون بيتـي بـلا طنـاب // في وجـه صلفـات الليـال المتينـه

وحقي عليهم ذبـح تسعيـن كـذاب // ومن فوق هـذا شرهتـي بالثمينـه

وإن ما فعلوا هذا فأنا مالي أصحـاب // بكره تبي تصبـح عضامـي دفينـه

بلغ لي الشعـار فـي كـل الأشعـاب // تـراك فـي حكـم الوصيـه رهينـه

وأنته تنوب وكل شاعـر ليـا نـاب // يصبح كما الربـان فـوق السفينـه

إما طلع و ألاّ هفـى هفيـة غـراب // والشعر ماهـو شـي لـولا سمينـه

بلغ شواعير النبـط تصـدر كتـاب // عن عالم(ن) شعـر النبـط ظالمينـه

قلت الوصيه واصله مابهـا أطـلاب // أبـداً تطمـن والمـراسـل أميـنـه

وقام وتلحف وأنسدح وأغلق البـاب // وبعد المرض عادت عليـه السكينـه

ولكم تحياااتي واحترااااامي
============================
يقول حواس الديري

يا جوهر القصة مثيرة للاعجاب
وانا تبلغت الرسالة بحينه
عبر الجزيرة ما تبلغت بكتاب
قريت قصة شايبن ظالمينه
في صفحة عشاقها مثل الاحباب
جسر التواصل للعقول الفطينه
صفحة تراث اجدادنا هم والاصحاب
يسلم محررها وعاشت يمينه
وانته طرحت الوضع باسلوب وآداب
بحكمه ماهو مصدر ظنون ظنينه
وعن قصة الشايب علمنا من الشاب
وتبا الحقيقة قصة العود شينه
وانته على التبليغ مأجور ومثاب
ومن قام بالواجب ترى الله يعينه
واليوم ابشارك وللحق طلاب
حبل الرحم ما نقطعه واصلينه
اليا نخاني طيب الاصل منصاب
اجاوبه بالصوت ما نستهينه
لحيث انا شاعر ولى رأي واحساب
والطيب بين الناس متقاسمينه
كلن على حقه حريصن وقضاب
بالشعر والا بالعلوم الحسينه
ما قول قولن ينقله كل سباب
نقالة النمة اخباث الظغينه
واللي على الشايب خطاهم بلا اسباب
ذولا العدل يا جوهر امخالفينه
شعر النبط ثابت له جذور واطناب
قديم ماهو تونا محدثينه
لو كان به ناسن يحدون الانياب
شعر النبط تاريخه مجودينه
ماضي وله حاضر وللنار شباب
فطاحلة شعر النبط محتمينه
وافين مافيهم مزيف وكذاب
ولا يقبلون الزيف ومزيفينه
اهل وفا وسلوم فكاكة انشاب
وبالعود تربطهم روابط متينة
موروثنا محفوظ عن كل نصاب
وعما يريب اتراثنا مبعدينه
متوارثينه بيننا مثل الانساب
ولا نطيع حساده ولا مشبوهينه
ما يندثر مهما تخطر من اصعاب
معنا على طول المدى حافظينه
وعن الدخيل اللي دخل فغلق الباب
مهما يحاول بالحيل ما نعينه