من يوم شفتك لين ودعتـك اليـوم

السلام عليكم ورحمة الله وبركاته

قصيدة بقلم الشاعر ياسرالتويجري وتعني لي الكثير

اتمني تعجبكم وتحوز على رضاكم

ما للعطا يامفـرط الكـف قيمـه = لاصرت ماني في سراياك محشوم


انته تمـد إلـي العطـاء والغنيمـه = وانا اعطي اللي من مقابلك محروم


كفي على بذل المحاسـن كريمـه = لوكنت ماني راس عصبه ولاقـوم


عثت بي صدوف الزمـان الأليمـه = اطيح ثـم اقـوم واطيـح واقـوم


وارقى على راس الشرف بالحشيمه = ولا على خدي معاريـف ووسـوم


وإن كـان ماقدرتنـي فالوخيـمـه = مقابلك لاصار مالـك بـي لـزوم


أنـا حصـانٍ ماقوتـه الشكيـمـه = تهبّني شملاً مـن الريـح واشـوم


اشوم شومـات الملـوك العظيـمه = إليا انتهض زيزوم وانحط زيـزوم


أنـا ليامنـي ضربـت الخريمـه = ورقيت في رجمٍ عن الناس مـزوم


هيضـت مـالا هيضتـه اليتيمـه = من هاجسٍ يفطر على الضيم ويصوم


وإلا انت يارمز القلوب الرحيمـه = منتب على وطي الكرامات مليـوم


ايامنـا عثـرات والعمـر غيمـه = ساقت جحافلها على ظلـم وهمـوم


وأنا ادري انك ماتحـب الظليمـه = ومشكلتي إني يابيض الوجه مظلوم


سياسـة التحجيـم لوهـي عديمـه = ماحجمت طلق الفضاء سحب ونجوم


لوكـل طقـه فالزمـن بتعليـمـه = ماكان منك اخذت خمـسٍ بتعلـوم


مـادام ماهيـب العلاقـه قديـمـة = لو كان فيها حب وإخلاص وعزوم


مـع السلامـه والنوايـا سليـمـه = من يوم شفتك لين ودعتـك اليـوم


والخافق اللي قد عثيـت بصميمـه = خذيت منه علوم واعطيتـه علـوم


ابذكـرك ياشبـل ابـوك ونديمـه = ياللي على عرشٍ من الزري مفطوم


يانادرة خمـس الحجـار الكريمـه = اصبر وانا ماني على الصبر ملزوم


الصبر مفتـاح الفشـل والهزيمـه = لاصرت تصبر وانت ماعندك حلوم


والقصر بيـت التفرقـه والنميمـه = وصقالبه ورجال تطبيـل ورخـوم


ياسرالتويجري