باب الشعر

26-03-09, 11:57 AM

قال من يدخل على الشعر مع بابه = ون دخل بالشعر يعطيه ماجوبه
ان مدح يشرح عن المدح واسبابه = ون نطق بعتاب ما يجرح اسلوبه
ون سمع كلمه مع الناس تغتابه = يتجاهلها ولو وجهت صوبه
ان تكلم منطقه يحسب احسابه = المثل من قال بالناس قالوا به
يبغض اللي للاجاويد سبابه = التعرض للمقفين له حوبه
والمشاكل ساسها ناس كذابه = صنّفوا ما يشتهون وتواصوبه
والكلام ليا لقو فيه متشابه = فسّروه برايهم ثم تنادوابه
من يود الهرج من صاحبك جابه = حشّ عرقوبك وهو حش عرقوبه
من عرفنا سيرته نفهم اطبابه = ونتوكد والمواز ين منصوبه
واعرف الطيب ولاارميه بغيابه = ولاستمع في هرجة عنه منسوبه
لكن اناديه وازيد بعتابه = وآخذ المطلوب واعطيه مطلوبه
آه من قلب جديد العنا صابه = كن فيه النار بالغاز مشبوبه
من زمان كل مابغاه عيابه = كنه يجازي على الصبر بعقوبه
عملة تلمع بها سرق ونهابه = لوتحقق بامرها قلت مضروبه
ما يغث الرجل ويثور اعصابه = مثل كلمة صاحب فيه مقلوبه
كلمة الطيب ليا حدّ مشدابه = عند من لايفهم الوضع مقلوبه
واحد ما يفهم الوضع يسعى به = غيّره واستدخله من تحت ثوبه
وعذروني من هرج حق ماعابه = ون حصل مني خطا يالله التوبه