مساجلة بين الشاعر جزاء صالح وبدر الحويفي

هذه مساجلة رائعة جدا بين شاعرين كبيرين من شعراء قبيلة حرب
هما الشاعر : جزاء صالح والشاعر : بدر الحويفي
حيث يقول الشاعر جزاء

يابدرما انتـه والعـذارى ولايـف=عنهن تراك ابعد من الجدي لسهيل
وفارقـت لامـا مترفـاتٍ عفايـف=بيض العواتق لا بسـات المفاتيـل
نجل العيـون معسـلات الشفايـف=وخدرات الأعين والحواجب مكاحيل
اللي عبثهن بالقلـوب الصخايـف=وكلٍ شكى منهن عـذاب وغرابيـل
ولو القلوب اجبال صارت خفايـف=وياما غدن بقلوب ربـعٍ حلاحيـل
والا بليد القلـب عنهـن مسايـف=ولا شوّقه دعج العيـون المظاليـل
وانته على ماقيل شايـف وعايـف=وعن الركـاب منزلالشيـل تنزيـل
ليا صار متنك صاير لـه سنايـف=وتدبح بمشيك واللأحجـة مشاهيـل
والزول مهدف والتراكـي نحايـف=ونظارتك سودا مثـل حالـك الليـل
وجسمك مثل عظم تضبّـه كتايـف=ولا باقـي الا هيكلـك والعصاقيـل
ومن كبرك سنك ماتبيك الوظايـف=والواسطه مالـك عليهـا مداخيـل
وعليك من سرحان بعض الوصايف=الذيب الأشهب فيـك منـه تماثيـل
ولو شافن الخفرات ماكنت شايـف=مايقبلنك لو قضن عمرهـن حيـل
ماهو ردا بك يـاذرى كـل خايـف=عند اللـوازم نعرفـك بالتفاصيـل
من روس ربعٍ ياخـذون العطايـف=وياما اتعبوا من سبّق الهجن والخيل
وفعولهـم بمصقـلات الرهـايـف=ليا طوحن سمر العذارى الهلاهيـل
وليا اعتلوا فوق المهار الزغايـف=يردون ساحات الوغى بالمصاويـل
وسوالفك عنـد النشامـا طرايـف=طرايـفٍ مابيـن شرابـة الهيـل
مافيك ماينقال وابيـض صحايـف=صحايفك بيضـا بيـاض الفناجيـل
لاراجـيً منـك ولانـي بخـايـف=انا اشهد انك من خيـار الرجاجيـل
سبعٍ تعشى وان هبـا كـل خايـف=لاشك كبر السـن مافيـه تجميـل
ويوم الصبا وانته رقيت المهايـف=ومعاك في كشف المسافات دربيـل
يوم الفزوز اللـي تـرب الحتايـف=تسري وتصبح قدمهـن بالمداهيـل
واليوم عصرك يافتى الجود طايـف=واسمح لغيرك قبل يـوم المراحيـل
واحذر تعـدي بالرجـوم النوايـف=يمكن علينا تجفّـل الصيـد تجفيـل
ورزقك على اللي مايدينـه قظايـف=اللي حمى ركن الحرم من هل الفيل
واسلم وسامح بالمـزوح الخفايـف=نبـي سوالفنـا طرايـف تعالـيـل
ترى على مثلك تجـوز العجايـف=والا الردي يابدر مابـه محاصيـل

رد الشاعر بدر بن عواد الحويفي

جزاء غزاني شاف غـزوي نكايـف=عنده خبر معرض عن القول والقيـل
ساقه علينا من هواء النـود طايـف=نـوٍ ثقيـل وفيـه بـرق ومخاييـل
وساسي حجر ماهو عشاش وصرايف=يهزهـا دفّـاع الامـواج وتمـيـل
ياللي بحـال العـود مانتـه برايـف=علي ينخونك بعـض نـاس بالتيـل
يبي علـى راسـي يلـف اللفايـف=طاوع صديقه والتمس منه تفصيـل
بمكبرات الصـوت يرسـل قذايـف=وركز مواقعهـا علـى غبـة النيـل
صارت صوايبهـن بجنبـي خفايـف=مرن ولا ضـرن سلامـه وتسهيـل
يارجل بالشيبان ويش انـت شايـف=زمل الحمول ليـا رغـن المخاليـل
مـن لايعـوه بشلفهـم راح عايـف=ليـا دبـرت خيـلٍ وخيـلٍ مقابيـل
قطاعة الصحـراء وجـرد الحتايـف=اللي بها حـرش الأفاعـي مشاويـل
وعندك خبر يوم المعوشـه خطايـف=ايـام غـارات العـرب والمصاويـل
ومن شب شاب وذاق عجز وكسايف=ذي سنة الدنيا وجيـلٍ بأثـر جيـل
وعندك خبـر للجيـل الاول خلايـف=ارجال ماتـوا والخلايـف رجاجيـل
ياللي على اسلوبكـم بـه جحايـف=يبحل به اللـي مايعـرف التحاليـل
هوم لو هـو مـن قلـوبٍ نظايـف=ابعد عن الشكه من الجـدي لسهيـل
محدود مايلمـس حقـوق الطوايـف=مضمونه الواقـع امـزوح وتعاليـل
موضوع ماله يـم غيـري هدايـف=تعليق من صاحب لصاحب بتسجيـل
يقول شايـب واحترمـت الوظايـف=والرزق عند اللي تكفـل اسماعيـل
وان كان عندك غير هـذي لغايـف=ياصاحبي لا تكـرب الحبـل بالحيـل
مافيـه داعـي للأمـور العنـايـف=العنـف يثـر بالصاقـه عراقـيـل
خل الهدف بينـي وبينـك مسايـف=تـرا الجمـال عيونهـا للجمامـيـل
والعـرف قـدوه للرجـال العرايـف=وانتـم عـوارف ماعليكـم مداخيـل
انتم رجال العـرف مانتـم عذايـف=اهل وفـا وسلـوم قـول ومفاعيـل
وصوغاتكم دايـم تجينـي غلايـف=واليوم صوغتكم بها نـوع تشكيـل
مهمـا علـى تـدورون الحوايـف=مانـي معاتبكـم بــرد التماثـيـل
وانا من الموضـوع مانـي بخايـف=اخاف يجهل وضعنـا سـاري الليـل
وتصير قصتنـا مقيـض ومصايـف=نزهـة فـراغ مجمعيـن الدهاويـل
ناسٍ تـذوق مـن بحرنـا غرايـف=جهـال تفتـح للسوالـف سرابيـل
السالفة لو هـي مـزوح وطرايـف=لازايـده وزنـه ولا ناقصـه كيـل
تفسيرها عنـد العقـول الصخايـف=كبر الجبل لو هي كبر حبـة الهيـل
لاكـن عليّـه لاتـحـد الرهـايـف=انـا محملنـي شقـا الحـظ تحميـل
وموسـرٍ عـود القنـا بالكتـايـف=ومسلّم امري رب موسـى وجبريـل
حقي من البيض الحسـان العفايـف=دور انتهى ماهـو مغـازل مهابيـل
ماهـو غـرام بالهواتـف خرايـف=واحلام بسلوك الهواتـف مراسيـل
اخـص راديـن العقـول الخفايـف=اللـي محبتهـم سماجـه وتضليـل
والا الرجال اللي سيّرهـم شرايـف=تمنعهم الشيمـه وسلـم الرجاجيـل
وحكمك بوضعي يارفيقـي سرايـف=اول هجـوم وتالـي الـدور تجميـل
خطة نشامـا مابهـا زيـف زايـف=تشـاورو واومـو لنـا بالمنـاديـل
وارسلت روس اقلام مامـن كلايـف=وارجي السموحه يارفيقي عن الميـل
ماعامل الطيـب بسـود الصحايـف=اهدي له الصوغـه تحيـات وكليـل
لـو كـان حـر ولا عليّـه حتايـف=ارتّل المعنـى عـن النقـد ترتيـل
وارضي بميزان النصف والنصايـف=ماني عوج يحتـاج نظـره وتعديـل
وان جنبت مانـي عليهـا مهايـف=ماحمّـل العاقـل شمـات العواذيـل
غيبـي بعيـد ولا بنـودي قظايـف=مـع احترامـي للنشامـا المشاكيـل
والطيـب ادمـح زلتـه والعجايـف=والا الردي شوفـي بعينـه سماليـل
في حاله الين من نسيـج القطايـف=وفي حاله اقسى من جبال البرازيـل
وتمت وصلوا عـد وبـل القنايـف=علـى نبـيٍ نفـل الديـن تنفـيـل

صح لسان العلمين الكبيرين ابو سلمان وابو صالح ...
مساجلة جميله وبحجم هاذين العملاقين المبهرين ....
قرات هذه الروائع حرفاً حرفاً واستمتعت ، مع ما اصابني من دوار .. حصانين جامحين يتعاركان
في ميدان الكلمات لا اللكمات ... يرخى لهما العنان احياناً ويشد ...
فعلاً تمكنا من ابهارنا بهذا السمو في الخطاب وعذوبة العجاريف وجمال الاسلوب وقوته وفهم
المعنى وذكاء الرد ..

منصور الوسوس
تتحفنا دائماً بالجميل الجزل لان اختيارك ياتي على مستوى ذائقتك المميزه ..
متعك الله بالصحة والعافيه ولك الشكر على هذا العزف المبهر
لك كل الحب والموده
...................

صح لسان الشاعرين الكبيرين

ومساجلة رائعة وجميلة من عملاقة الشعر

اشكرك اخي منصور لنقك واختيارك الرائع

وتقبل تحياتي

ابو محمد سلمت على النقل اللميز

و صح السان الشعران الكبيران

ويبقى الاثنان من اعلام الشعر في القبيله


تحياتي للجميع

عندليب المجالس وشاعرنا الرائع
خلف الفريد
تنفرد دائما بالاسلوب الادبي الجميل ولاغرابة في ذلك
لك وافر التحايا على اطلالتك الغالية ومرورك العذب
شكرا لك ودمت لنا مبدعا متواجدا
تقبل اجمل تحية

مزعل الفريدي
شكرا لمرورك وذائقتك الشعرية الرائعة
دمت بود

ناصر بن دليله
شكرا لاطلاعك ومرورك الغالي
دمت لنا متواجدا ومبدعا
تقبل ازكى تحية

الله لايهينك ابامحمد مساجله من مدرسه جزاء بن صالح الحربي وبدر الحوفي الحربي

علمين لهم في الشعر مكانه كل شاعر يعرفها

وهذه المساجله بالذات لها طعم خاص فيها من الجزاله والطرافه والفكاهه الشئ الكثير


الف شكر ابا محمد وانت كذالك علم الله لايحرمنا منك ويرزقنا ويرزقك الذريه الصالحه

واحييت قسمي ونفظت الغبار عنه الف شكر والسلام

المبدع الشاعر الرومنسي ابوعمر
اشكرك على كلماتك الراقية واسلوبك الجميل وجودك على
هرم هذا القسم اشرافا اعطى لقسم المساجلات نكهة خاصة
فمادته المتجدده تجبر الجميع على المشاركة
واما شعراء مساجلت هذا الموضوع فهم كماتفضلت من الاعلام
الذين يستفيد منهم الشاعر المبتدي والمتذوق للشعر ,
شكرا لمرورك العاطر ودمت بخير وعافية

غيبـي بعيـد ولا بنـودي قظايـف

مع احترامـي للنشامـا المشاكيـل

والطيب ادمـح زلتـه والعجايـف

والا الردي شوفـي بعينـه سماليـل

في حاله الين من نسيـج القطايـف

وفي حاله اقسى من جبال البرازيـل

اشكرك اخوي منصور على النقل الرائع

وجزاء والحويفي


كواكب مضئة في سماء الشعر