عشت في الدنيا وهي دنيـا وروغتهـا عجولـه=وخذت منها ما خذا (عامر) و (حاجب بن زراره)
يا فتى خذ من حكم من كل الاشهاد اشهـدوا لـه=حكمة العاقل على راس العصـا مثـل الصهـاره
المنايا مخلـبٍ فـي كـفّ نسـرٍ مـن يطولـه=شاح به شوحة حصاةٍ حوّلـت مـع راس قـاره
المنايـا مـن بغـت يـومٍ تنولـه, ابـتنـولـه=لو تشيطر فـي تفاديهـا مهـي لحيـة شطـاره
لولا تفريق المنايـا ضولـةٍ مـا شفـت ضولـه=تجتمـع, يـا للعجـب والهـول بـل ياللإثـاره
موت دوله, لـوّ مـا يعنـي لنـا ميـلاد دولـه=كان ما شفنا اختلافٍ في حضاره عـن حضـاره
لا يغرّك يـا فتـى قفـر تطـارد بـه وعولـه=كمّ مع ساقة وعـل قفـرٍ مشـت لبـوة مغـاره
اخطر الاعداء من يضحك وهو يسـرج خيولـه=واخطر الأصحاب من سرك معه, وتشـق إزاره
فتكتك باللي هو اضعف منك مـا فيهـا بطولـه=البطوله أن يكـن فتكـك بمـن فاقـك جسـاره
قبضة السلطـان مـن لا يـدّرق عنهـا تغولـه=ومن يعاندها تجيبه لـوّ فـي بطـون الجحـاره
خلّ عنك الجدّ مع مـن أمـسٍ آخذتـم زمولـه=مازحه ينسى,فقـد تحيـي سويعـة جـدّ ثـاره
من يحـاول أن يغيّـر ذو ميـولٍ عـن ميولـه=مثل من يسعى إلى تغييـر نجـمٍ عـن مسـاره
في خروج المرء عن ما حبّ-من قلب- دخولـه=سقطةٌ,والمـرء لا يجـدي بكـارٍ غيـر كـاره
الفشل وقـت النجـاح إيـاك تستبعـد حصولـه=النجاح اكبر فشل إن مـا أخذتـه عـن جـداره
القبـول مـن الله ولا يَحسـد المـرء بقبـولـه=غير ناس مـن حسدهـا تلتـوي بذنيـب فـاره
كـم صديـقٍ بادّعـاء الـود صجّتنـا طبولـه=والحسد كل الحسد شفنـا علـى وجهـه أطـاره
نية الحاسد لحاف أجرب ولـو جتـك مْغسولـه=ماله الا الحرق لو بـرد الثـلاث يطـق طـاره
كلّ مـا يخفيـه ابـن آدم ولـو حـاول يحولـه=تظهره فلتـة لسـانٍ منـه أو مـالعيـن إشـاره
يا مـدوّر مرجلـة مـن لا ملـك ذرّة رجولـه=يـا مـدوّر إبـرةٍ فـي قشـةٍ كبـر الـزبـاره
إن موت الشعب أن ترحـل مـن الفقـرِ عقولـه=الفقر مـا حـلّ فـي شعـبٍ ولا ورّث دمـاره
حاكمٍ مشّى عليـه اربـع ميـة كذبـه رسولـه=انتبـه تصـدق معـه ممكـن يحسّبهـا صقـاره
كم فضولي في العرب ساق لـه حتفـه, فضولـه=كم طميميـعٍ خسـر دينـار فـي تدويـر بـاره
يوم ولد اللاش ما تطهـر مـن الخيبـه همولـه=الرجـال فعولهـا زادت ملابسـهـا طـهـاره
الفحوله أن يزيدك قُـلّ مـا فـي إيـدك فحولـه=والحقاره أن يزيدك كثر ما فـي إيـدك حقـاره
لا تطب بوادي أرضٍ ما حسبت حسـاب غولـه=يـا كـلاك الغـول وإلا يـا تعشّتـك النـمـاره
واعرف انْ ما جاء بْسهوله دايم يـروح بسهولـه=والصعب روحته صعبه والفتى راضـي وكـاره
ليس لـاللحيه وهـي بيضـا علاقـه بالكهولـه=إنما الكهل الحقيقفـي مـن فقـد معنـى وقـاره
كم عزيـزٍ أورده حـوضٍ مـن الذلـه خمولـه=والترف في بيت أصحاب الشرف يعني انهيـاره
بالأُسُل لا بالكسل ما طـال مـن شـيءٍ تطولـه=تدرك الأمجاد قسـراً غـارةٍ فـي إثـر غـاره
كـم مخاليـق تهابلهـا ولا هـيـب مهبـولـه=لبّست راس الغبي- من حيث لا يدري- غضاره
لا تثق في واحـدٍ ترشـح مـن الهيْنَـه سمولـه=النذل يبقـى نـذل لـو يرفعـك فـوق المنـاره
كم دنـيءٍ بالفلـوس اشيـوخ نجـدٍ وقفـوا لـه=في رجا ما في يده ما يجلس إلا فـي الصـداره
المراجل سيل مـن عنـده مـن الدنيـا سيولـه=كم شريـفٍ مـن فقـر جيبـه يخلّونـه عيـاره
ما ينال العـزّ مـن نفسـه مـن العـزّه جفولـه=الثنا يوخـذ بأطـراف القنـا مـا هـو طـراره
اتّحمّـل مـا يواجهـهـا منبّـشـة الدحـولـه=في الهبايا ما يعطّـل مـن جمـع بـدوٍ عشـاره
(المغولـي) بالمسـاواه أعظمـوا أمـره مغولـه=(والفزاري) بالمحابـاه احقـروا أمـره فـزاره
الزمن هـذا كتـاب جـاء فـي آخـر فصولـه=شعب كامل قـد تشـوّه هيكلـه نشـوة زقـاره
الجهاله في تجاهل من عليـك اوصـى جهولـه=كـل خُلـق بغيـر وقتـه لا أرى فيـهِ نعـاره
ليث واحد ممكن يـدوّخ بلـد عرضـه وطولـه=والف قرد وقرد ما فكّـت مـن بعيـرٍ هجـاره
ليس من شرط الشهامه أن تجـاول كـل جولـه=أو بـأن تنـزل بأعلـى قمـة رغـم الوعـاره
فالأسد يبقى الأسد في قـاع كـل ارضٍ نزولـه=والوباره دايمٍ في اعلـى الجبـل وهـي الوبـاره
قل لبعل السوء عمر الضرب مـا أثبـت بعولـه=رغـم ليـن المـاء قطراتـه يشقّـنّ الحجـاره
في اقتفاء المجـد تابـع لا تكـن نفسـك ملولـه=يدرك الصعبات من لا نام راسـه مـن عـواره
كم رجل من زود حذره نفسـه اليـوم مختولـه=بل ومن نفس الشيَ اللي يحذره واخفـق فـراره
واحدٍ يـزرع بـلا قصـدٍ وتثمـر لـه حقولـه=وواحدٍ يزرع وهـو قاصـد ولا يجنـي ثمـاره
زارع المعروف يرجي من ورا الناس محصولـه=ليس معروفه بمعـروفٍ قـدر مـا هـو تجـاره
رغم فقري كم ولد نعمه -غني وبخيـر- اعولـه=لإن ابوه معلّمـه كيـف يْحَفِـظ قرشـه مهـاره
يا فتى دوك النصايح أخذها مـا ابغـى عمولـه=استفد منهـا وأفِـد علـمٍ أعرتـه لـك إعـاره
خذه واتركنـي لأنّ الليـل قـد أرخـى سدولـه=حان وقت مْعَـاوَدَة ميـلاد طفلـي واحتضـاره