يا هر يا للي ما علومه جميلــــــــــة = أكلك وشربك من حرام بحرامــــــــي
أنت الجبان اللي حياتك ذليلــــــــــة =ما بك شجاعة يا خسيس المقامي
وقت السفر مالك بالأسواق زيلــــه= وتظهر إلى غطى عليك الظلامـــــي
ما غير تهرف في البلد كل ليلــــــــه = وتسلب وتنهب والخلايق نيامــــــي
ما فكهم منك الحصون الطويلــــــــة = لو كان دونك ناطحات الغمامـــــــــي
ما شفت يوكل .. من محله تشيلـه= لو كان مالك حاجة بالطعامـــــــــــي
حتى اللبن لازم تحلحل صميلــــــه = وتحرص على نثره بكل اهتمامـــــي
حب الفسق طبعك ولا فيك حيلــــه =طبعٍ ورثته من خوال وعمامــــــــــي
السرق ما يمكن تخلي سبيلــــــــه= والله حسيبك كيف تأكل حمامــي؟!
تسعٍ سمانٍ ما بهن الهزيلـــــــــــــه = والجوز منهن بالثلاثه يسامــــــــــي
ومن الدجاج أذهبت صفرا جليلـــــه = وديكٍ ينادي بالدجى للقيامـــــــــي
نسل دجاج ما يعرف الطبيلـــــــــــه = ماكنه إلا من سلايل نعامــــــــــــي
هي رأس مالي والموارد قليلـــــــه =واعدمتهن عني عساك العدامـــي
غير الرجا في الرب مالي وسيلـــه = مانيب تاجر، ياقليل الرحامــــــــــي
اشكي على اللي ما يخيب عميلـــه = فردٍ صمد من لاذ به ما يضامــــــي
وإن عاش رأسي لعتبي لك بكيلــه = في شوزنٍ تفري صليب العظامــي
اذبحك وابرد من ضميري غليلــــــه = من شان عيني تهتني بالمنامـــي
راعي الخطأ يجزى عليه بمثيلـــــه = ومن عال يبشر بالعنا والندامـــــي