هبيت يا حظ الردى وش تبـي بـي = وأنا من كبار البخـوت السناعيـس
أعـوذ بالله مـن ردات النصيـبـي = ومن وقعت ن تفرح بها شلة ابليـس
بقيت أنا والشعـر خـلّ وصحيبـي = يفزع ليا كثـرت علـي الهواجيـس
يا عيال خوذوا لي كلام ن مصيبـي = لأهل العلـوم الخايبـات اللواليـس
دُبّ الدهر ولْـد العفـن مـا يطيبـي = لو طاب ذيل الكلب يبقى ولد هيـس
واللي يجربهـم يشـوف العجيبـي = يلقى رجال مـن المراجـل مفاليـس
درسـت بسكاكـا ولا لـي قريبـي = ألا إله الكـون عـدل المقايـيـس
لقينـا وشفنـا مـا يهيـل اللبيبـي = وبانت علوم اهل الردى والدنافيـس
الهقوة الشينـة بهـم مـا تخيبـي = الله يخزيهـم وجـيـه الابالـيـس
وأخص به ناس ن بهم كـل عيبـي = أهل النفاق وهرجهـا فيـه تدليـس
زيـلان لا تـودي ولا هـي تجيبـي = وصاحيهم اللي فيه مس ن و(تنفيس)
والله لو يفحصهـم أحسـن طبيبـي = يقـول ماعنـدي دوا لعلـة الهيـس
المنبـت الطيـب نتاجـه يطيـبـي = والمنبت الخايس يجي ناتجه خيـس
هذا وانا من( صلب ضيغم) عريبـي = كم واحدن (محتال) باقدامنـا ديـس
وانا احمد الله فارج ن كـل صعيبـي = اللي فرجها لي بـلا عـدن وقيـس
قلتـه والله لـي ضميـن وحسيبـي = يعلـم بحـال الادمـي دون تلبيـس