ياحمود عن بعض السوالف وقفنا=والا المثل يصغي على كل طاروق
والله ماقول ولو يقال اختلفنا=ما احط بالرحبي على الحربي فلوق
مافيه مايوجب سوالف سلفنا=لانهد سور ولا لنا شي مسروق
اللي مضى لكنوزنا ماصرفنا=ولافيه مايوجب عزاوي هل النوق
ما بان رسمٍ لومسميه يفنا=يبقى مثل يطري على كل مخلوق
حنا الرجال اللي عزيزٍ شرفنا=وقفاتنا عدله ونظراتنا فوق
يفهم مدى تقديرنا من عرفنا=ويجهل مدى تاثيرنا ناقص الذوق
عن غيرنا يابعد مركز هدفنا=قمة جبل ماياصله طق ولحوق
عوج السوالف ما تلف بطرفنا=من يوم كنا ملها عندنا سوق
نسكت حيا بعذار ما الله كلفنا=متجاهلينٍ ردت الصاع مطبوق
ما همنا من ذمنا لو وصفنا=بتفه خبر من مصدرٍ غير موثوق
يصحي بنا النايم متى ما انحرفنا=يطير عن عينه كرى النوم ويفوق
لو بالسجلات القديمه كشفنا=نعد بالجاني ثمانين خازوق
نخشى متى ما للبناية نسفنا=نركب خطأ وندان من حرب بحقوق
ويصيبنا حتى العمى لو حذفنا=ويبقى ذرانا قدم الاجناب مفتوق
واليا حصل من لانبي بعد اسفنا=اسرار رحلات الفضاء وسط صندوق