يافلان يكفيك قيـل وقـال=كنّك وصي(ن) على النمـه
هرج القفا صار لك مـوال=لالك ضميـر(ن) ولا ذمـه
ان جاك احد زانت الاحوال=وان راح رديتهـا يـمـه
تضحك على نفسك وتختال=وتطير فـي عجـة الهمـه
وليا نصحنـاك زدت هبـال=وان جبتها جبتهـا مطمـه
تهتم في كل حـال وحـال=والنـاس ماهيـب مهتمـه
غلّك تبلور وصار اغـلال=وكبّل طموحك عـن القمـه
حطيت زيد انـذل الانـذال=وعبيد مدري وش اصل امه
وفلان عندك كثيـر جـدال=وفـلان تخطيـه وتخمـه
ترى الحكي والحسد قتـال=ليا انتثـر بالصـدر سمـه
اقضب لسانك على ماقـال=كـل(ن) عذاريبـه تضمـه
والغيبه تسـوّي الاهـوال=وتشتـت النـاس والامـه
(واوّل مواري ردى الرجّال=لاجاك يبغض بنـي عمـه)