في كفها خاتم وفي خدها خال=وفي عينها غيم وعمارات وبيوت
الخال شفته واضحٍ من ورى الشال=والخاتم الماس مرصع بياقوت
والعمر في العشرين كني ماني بزال=والجسم كنه من جبل ثلج منحوت
جبل ولكن لا طرقه الهوى مال=وخطواتها ماهي بالأمتار بالفوت
ماهي تشوف الشمس من ظل لظلال=ومصيافها ما بين لندن وبيروت
الشمس لو تشرق على جسمها سال=كنه مجسم مهلبيه وبسكوت
ومن صغر مبسمها شقى حالها الحال=ما تأكل الا اللوز والخوخ والتوت
ماهي تشوف الناس تمشي وتختال =ومر على جاكور ومر على حوت
وخدامتين وهي بلا زوج وعيال =وسمعتها تدعي الدريول يياقوت
وثلاث جوالات ماهو بجوال =ومن يوم خلقت كل شيءٍ بريموت
لكن قلبي مالها فيه مثقال =وش قرب البشت الحساوي من الكوت
ياجعلها للي خذت قلبي نعال =اللي غلاها عندي الشرب والقوت
حوريةٍ من فوقها الليل شلال =كنها صباحٍ فوقه الليل مكتوت
قلبي لها من كثرة الشوق مشخال =وللسر عن كل المخاليق تابوت
تنحت لي من الحب في القلب تمثال =وحبي لها ينحت على الساحه بيوت
في عينها ماكل رجال رجال =وأقصى حدود الوصل في سلمها الصوت
زودٍ على القلب وعلى الحسن من آل =روسٍ لهم روسٍ على متونها بشووت
الى رضت موتوا يا أهل روس الأموال =وإلى زعلت جربت وش سكرة الموت
من دونها رجلي وراكب وخيال =والسيف والأمواج والبحر والحوت