يا ابو بكر سلم ولا تقول بنجور =خل عنك يا ابو بكر رطن الخواجات
وعطنا قهوتك اللي بها البن مقطور =لا كيفها كيف ولا سواتها سوات
يا عنك راسي من كثير الغثا يدور =دور النجوم السابحة في المدارات
البارحة كني على السهر مأمور=البارحة والله محاكيك ما بات
وجدي على دار بها القلب مسحور=وجدي على من وصلهم بالمناجاة
ربع عطيناهم مواثيق ونذور =ما يخلف عهود الوفا طول غيبات
بيني وبين دياري ديار وبحور =ما بيننا اصبح حدود ومسافات
ودعتهم من يومها القلب مكسور=والنفس ارهقها من الموت غارات
ودعتهم ودعت انا غادة الحور =ريم على فراقي له اليوم شرهات
ارسل سلامي لهم مع طلعة النور =ولاهبت الذكرى من الشرق نسمات
وارسل سلامي كل ما حل ديجور =ولا ناض برق له من هناك شارات
اصبحت اواري سقمي بضحكة زور=واداري همي عن جليسي مداراة
عزاه لي انده من الضيم مقهور =وهيهات من يسمع صدى الصوت هيهات
اشكي بعدهم لوعة الهم والجور =اشكي ولا اسمع من يقللي سلامات
يقطعك وقت مالنا في دبرتك شور=كم قيض بكف الكدر من مسرات
ويقطعك دنيا عهدها دوم مهدور =ياما تبدل منها الاحسان سيات