يحـق لـك تفتخـر ياسـيّـد الغـيـد = مـدام لـك شاعـر ٍ ماهـوب عـادي
وقت الفرح شعره اصـوات الزغاريـد= ووقت الحـزن كنـه ثيـاب الحـدادي
يصـوّر اللـي يشـوف بكـل تجريـد = ويهيـم فـي كـل قفـر وكــل وادي
لـي بنـدق ٍ ماتكّـذب حـزة الصـيـد = ولي خاطر ٍ لانـوى المقنـاص صـادي
سهل اعجب وسهل شخص بشعري يشيد = لكن مـن الصعـب كرهـي وانتقـادي
ماهو كبر والكبـر عـن راسـي بعيـد = بعـد الشياطيـن لانــادى المـنـادي
مكانة ٍ واصبحـت لـي كيـف مااريـد = شي ٍ حصـل عقـب ربـي باجتهـادي
مااقـول انـا الرقـم الاوّل بالقواصيـد = اعـوذ بالله مــن ذنــب التـمـادي
بـواردي ٍ ومـن حـولـي بـواريـد = لكنـي افـخـر بمايكـسـب زنــادي
البارحـه كـانـت الليـلـه سرامـيـد = قضيتهـا كنـي بسـجـن انـفـرادي
اسرح مع هجوسـي جمـوع ومفاريـد = وشوقـي للاحـبـاب شــي ٍ لاارادي
وشلون ابنسـى هـذاك الوجـه واهيـد = وانـا رجـل فاقـد ٍ غايـة مــرادي
(صبـح الجهـام) اللـي بليّـا تغاريـد = وليـلٍ بـلا شوفتـه (ليـل الهجـادي)
ياحسن الاوصاف ياللي شوفتـك عيـد = بالله ماشفـت وش سـوّا البـعـادي؟؟
ابعدت واصبحت ماانـت بقبضـة الايـد = واضحيـت ببـلاد وانـا فـي بـلادي
عمومـا ً اذكّــرك واعـيـد وازيــد = والله لتبطـي وقـدرك فــي فــوادي