سر ياقلم واكتب جوابك على هون=سطّر اجزال الشعر واترك هزاله
يامرحبا ومن التراحيب مليون=بالشاعر اللي مطلبه ما صفا له
يسأل سوالٍ يسأله كل مغبون=ودّه يعدل والزمان ارتكى له
ياصالح الدنيا بها ميل وشطون=ومن اللي يعدل ميلها من هباله
لا صار كفك يابن هلال مدهون=انت الرفيق اللي يغطّى خماله
ومن شان مالك كلهم وجه وعيون=وتلقى لهم حول المضيف اجتواله
وان قل مالك قالوا فلان مجنون=ماهو تكان اللي يضيّع حلاله
واليا ادبروا لعلهم ما يردّون=حطوا بك الشينات خبث ونذاله
اقوى البنا يبنى على ساس وركون=والا ضعيف الساس عجل ٍ هياله
ولا انتقص ناس ٍ على الصدق يصفون=يعدّهم خطو الرجل من عياله
تعرف بهم صدق النوايا ويوفون=وليا حداك الوقت طيْب ورجاله
واهل الوفاء لاتحط من دونهم دون=المال يفنى والصداقه رساله
هذا جواب اللي امجّرب ومطعون=جرّب من الطعنات فوق احتماله
وصلاة ربي عد منهم يلبّون=للواحد المعبود جلّ جلاله
وعد النجوم اللي تعلت على الكون=على نبي الخلق والصحب وآله