مجالس الفرده - قصيده الشاعر بديوي الوقداني

السلام عليكم ورحمة الله وبركاته

قصيده للشاعر بديوي الوقداني (رحمه الله) أتمنى تعجبكم

ايامنـا والليـالـى كــم نعاتبـهـا
شبنا وشابت وعفنا بعض الاحوالـي
تاعـد مواعيـد والجاهـل مكذبـهـا
واللى عرف حدها من همهـاا سالـي
اذا اقبلت يـوم ماتصفـى مشاربهـا
تقفي وتقبل ومادامـت علـى حالـي
فـي كـل يـوم تورينـا عجايبـهـا
واليوم الاول تراه احسن مـن التالـي
ايـام فـي غلبهـا ويــام نغلبـهـا
وايـام فيهـا سـوا الدهـر ميالـي
جربت الايـام ومثلـى مـن يجربهـا
تجريب عاقـل وذاق المـر والحالـي
نضحك مع النـاس والدنيـا نلاعبهـا
نمشي مع الفي طوع حيث مـا مالـي
كم مـن علـوم وكـم اداب نكسبهـا
والشعـر مـازون مثقـال بمثقالـي
اعرف حروف الهجا بالرمز واكتبهـا
عاقل ومجنون حاوى كـل الاشكالـي
لكـن حظـى ردى والـروح متعبهـا
مافادنى حسن تاديبـي مـع امثالـي
ان جيت ابي حاجه عـزت مطالبهـا
العفو ماواحد في النـاس يـا والـي
قوم الـى جيتهـم زفـت شواربهـا
بالضحك وقلوبها فيهـا الـردا كالـي
وقوم الى جيتهـم صكـت حواجبهـا
وابدت لي البغض في مقفاي واقبالـي
ماكنـى الا مسـوي حـال مغضبهـا
والكل فـي عشرتـه ماكـر ودجالـي
ياحيف تخفي امـورآ كنـت حاسبهـا
واللي على بالهـم كلـه علـى بالـي
الجـار جافـي وكـم قـوم محاربهـا
والاهل واصحابنـا والـدون والعالـي
الروح وش عذرهـا تـرك واجبهـا
راح الحسب والنسب في جمع الاموالي
نفسي تبي العز والحاجـات تغصبهـا
ترمى بهـا بيـن اجاويـد وانذالـي
المـال يحـي رجـال لا حيـاة ابهـا
كالسيل يحي الهشيـم الدمـدم البالـي
عفت المنازل وروحى يـوم اجنبهـا
منها غنيمـه وعنهـا البعـد اولالـي
لا خير في ديرت يشقى العزيز ابهـا
يمشي مع الناس فـي هـم واذلا لـي
دار بهـا الـخـوف دومٍ مايغايبـهـا
والجوع فيها ومعها بعض الاحوالـي
جوعـى سرحينهـا شبعـى ثعالبهـا
الكلـب والهـر يقـدم كـل ريبالـي
عز الفتى راس ماله مـن مكاسبهـا
يامرتضى الهـون لا عـز ولا مالـي
ذللت الروح ليـن ارخصـت جانبهـا
وانا عتيبي عريـب الجـد والخالـي
قومٍ تدوس الافاعـى مـع عقاربهـا
ولها عزايـم تهـد الشامـخ العالـي
خـل المنـازل وقـل للبيـن يندبهـا
يبكي عليهـا بدمـع العيـن هطالـي
لا تعمـر البيـت والقـالات تخربهـا
بيع الردى بالخساره واشترى الغالـي
دار بــدار وجـيـران نقـاربـهـا
وارضٍ بـارض واطـلال ٍ باطلالـي
الناس اجانيب ليـن انـك تصاحبهـا
تكون منهـم كمـا قالـوا بالامثالـي
الارض لله نمشـي فــي مناكبـهـا
والله قــدر لـنـا ارزاق واجـالـي
حـث المطايـا شرقـهـا وغربـهـا
واقطع بهـا كـل فـجٍ دارسٍ خالـي
واطعن نحور الفيافـي فـي ترايبهـا
وابعد عن الهم تمسي خالـي البالـي
مـن كـل عمليـه تقطـع براكبهـا
فدافـد البيـد درهــامٍ وزرفـالـي
تبعدك عـن دارٍ قـوم ودارتقربهـا
واختـر لنفسـك للمنـزال منـزالـي
لو مت فـي ديـره قفـرا جوانبهـا
فيها الوطى السباع الغبـس مدهالـي
اخير مـن ديـره يجفـااك صاحبهـا
كـم ذا الجفـا والتجافـي والتعلالـي
دوس الخاطـر ولا تخشـى عواقبهـا
الموت واحـد وبعـد العـز يجلالـي
ان المنـايـا اذا مــدت مخالبـهـا
تدركك لو كنت في جو السما العالـي
ماقرت الاسود فـي عالـي مراقبهـا
تسعى على الرزق ماخلـت للاشبالـي
والشمس في برجها والغيـم يحجبهـا
تقفى وتقبل لها فـي الفلـك مجدالـي
رب السمـاوات يامحصـي كواكبهـا
يامجري السفن في لجـات الاهوالـي
ضاقت بنا الارض واشتبت شبايبهـا
والغيث محبوس يامعبـود يـا والـي
يالله مـن مزنـه هـبـت هبايبـهـا
رعادها بات له فـي البحـر زلزالـي
تسقى ديارآ شديـد الوقـت حاربهـا
ما عاد فيها لبعـض النـاس منزالـي
ياجاهـل اسمـع تماثيـل ٍ مرتبـهـا
فيها معانـى جميـع القيـل والقالـي
مثـل الدنانيـر زادت فـي قوالبهـا
في صرفها زايده عن قرش وريالـي
يـارب توبـه وروحـى لا تعذبـهـا
يوم القيامـه اذا ماضاقـت اعمالـي
وازكى صلاةٍ على المختـار نوهبهـا
شفيعنا يـوم الحشـرٍ فيـه الاهوالـي