يادمعه تجري على الخد بسكات=حنّي على وردٍ من الحـزن غافـي
وشّمك بخدي صايـرٍ لـه علامـات=والخدّ مرهف حس والدمـع حافـي
لا تجرحينه كـان عنـدك مـروّات=يكفيه دمعة غلّ مـن جـرح وافـي
ويكفيه لا طحتي تصيح السّمـاوات=من حزنك اللي صام فرضك وطافـي
مخدّتـي صـارت لوفـدك محطّـات=تبكي معه وتصيـح ياعيـن كافـي
بينك وياما بين الأفـراح صـولات=يامـا خذلتـي ضحكتـه ماتخـافـي
وشطّ الهدب بينك وبينـه حكايـات=كم غازلك وأبكى جيـوش المرافـي
يادمعتي طالـت علينـا المسافـات=وأنـا وحزنـي ساكنيـن المنافـي
تعبت أغلّف دمعتـي بـابتسامـات=بشفـاه جرّحهـا الولـه والتّجافـي
مرّات أحسّ إنـي حزينـة ومـرّات=من زود حزني شفت ظلـي خلافـي
ياما رسمت الحلم وأجمـل بدايـات=مع فارسٍ يعطي من القلـب صافـي
وكوخٍ صغير وشمعتيـنٍ صغيـرات=ما كنت أحسب إن جاير الوقت ضافي
لين إلتحف حلمي يردد بهيهـات=هيهات ياحزنٍ عـن النـاس خافـي
لوعّتني ياوقت والحلـم مـا مـات=كل ليلة يلفـي علـى القلـب لافـي
أحلم وذنبـي مارضيـت النهايـات=ودّي أعيش بصدق في حضن دافـي
حلمي كبير وأصغر الحلـم غايـات=وجرحي كبير وأصغره هـو لحافـي
يادمعتي تكفين انسـي الـذي فـات=وأمشي ندور منهو للجـرح شافـي
صعبه أعيش بدنيتي مثل الأمـوات=وأصعب يموت الحلم موت العوافي!!

شكراً اختي الطرف الخجول
على الاضافه الرائعه وصح لسان الشاعره
تحيتي

صحت ابدانكم
الله يعطيكم العافيه على المرور الرائع



لاعدمت المرور ولا طيب الرد