مجالس الفرده - يامل قلبٍ ياخو جوزاء له ايام سبيل سند الحصني

يامل قلبٍ ياخو جوزا له ايام = معمومسٍ ماله مع الناس شبلي

من واحدٍ حاكم عليه بالاعدام = حاكم علي الا ان ربي عجب لي

نور العيون ومرمسه عنه الاعلام = بشرت فيه وقلت شوفه وجب لي

وسيرت يجذبني هوى القلب قدام = طير الفرح لا قلت هون لعب لي

وعيني تحرا ارموقها ترف الاقدام = متى تشوف اللي مع الملح قبلي

لكن مسياري جلب لي الاوهام = الياس من زرع الضماير نصب لي

ناديت يا مفقود وينك من العام = ياللي لنا بالحال تبني وتبلي

واقفيت مارد الخبر عين غشام = مدري جفا ولا عذابٍ كتب لي

ياطير واقلبي تصرم تصرام = ود الكتاب ومن حسانيك جب لي

مردود ملهوف الحشا عجل واشمام=واعطيك مالي وعلى ثنو حبلي

اما دريت انا على ود وحشام = والا ما احسب لواحدٍ ماحسب لي

ودنياك حاليها لابو زيد مادام = ولا كل ماهب الهوا هب قلبي

مع كل مرياعٍ للارياح مهجام = ياطيب الرفقه زماني عتب لي

لكنها قصة مقادير واحكام = ولا نيب اقول لمر الايام طب لي

كم واحدٍٍ قبلي سرى الليل ما نام = على ذهيبٍ له مثل ما ذهب لي

اليوم مثلي بس جلدٍ على عظام = يوم اني انعى مهرتي صاح قبلي

مهرة يشوق اركوبها كل طيطام = يوم الفشق وقعه تقل ضيق وبلي

مايعتلي سرجوفها كود عزام = لولا غلاها وش يجيب التعب لي

مرواح ياخذني غلاها ومجهام = عزالله اني ياهل الخيل مبلي

وهني عينٍ تمتلي قبل هدام = من غرةٍ ربي عليها حجب لي

لين ان قلبي عن هوى غيرها شام = والله جبل خلقه على كل جبلي

الشاعر سبيل بن سند الحصني رحمه الله