ايها الاخوه وجدت هذه القصيده وأعجبت بها

وأحببت نقلها لكم لعلها تليق بمقامكم وتنال رضاكم


القصيـــــــــــده :-

يا صاحبي مسموح لاخانك الشوف =لو كان ضلع طويق ماهوب خافي
ماني ضعيف ولا تحيزمت بضعوف =والحمد لله مشلح العز ضافي
كم لاح قدّامي عراقيل وصدوف =ورميتها من فضل ربي خلافي
وزلة رفيقي دايم تمر واتطوف =ما حاسبه عن زلته يالسنافي
أقول يمكن وقتها مر بظروف=وهذا الزمن طبعه يجيه اختلافي
رأيي ولاني في رضا الناس مكلوف =لاصار عقله مقتنع فيه كافي
مار العتب في سلم الاخوان مألوف =ولا يوصل الموضوع حد التجافي
أرض المعزّه ما على زرعها خوف =ما زارها ركب السنين العجافي
ويا صانع المعروف تجزى بمعروف =ما يجحد المعروف يا كود هافي
اسمك من القاموس ما هو بمحذوف =ومراكبك ما غادرت عن ضفافي
لكن أبرسم لك على أوراقي حروف =مشاعرٍ رتّبتها بالقوافي
والسمع ما يطرب على كل معزوف =ولا يعجب العينين كل ما يشافي
وصدري كتابٍ للقريبين مكشوف =والقلب مع كل المحبين صافي
أفرح بجيتهم ليا حلّوا ضيوف =وأنا لهم مخلص وصادق ووافي
هذا حسب وصفي وكلٍ له وصوف =والله هو اللي مطّلع بالخوافي

الشاعر/ صالح محمد العنزي