غيبتك لو هـي دقيقـه تعتبـر صـدّه=الوقت دونك سجـن وغيابـك اسياجـه
لا تعتذر لي تـرى ماعـاد فـي شـدّه=اعيد حكي ٍ يكـود الصـدر مخراجـه
دامـه يوصـف بجـود ابيـك وبجـدّه=وشلون تبخل على المجروح بعلاجـه؟
ووشلون قـاوااك قلبـك رده وصـدّه=مع انه بيّن عليـه الضعـف والحاجـه
ياقـو قلـبـك بــرد ايميـنـك وردّه=بخلت بمصافحـه وارهيـت بحراجـه
لو ماسقى غيم عينـه جرهـدي خـدّه=تـراه يبكـي وقلبـه يلحـق اخلاجـه
ولو شفته يمازحـك تـراه مـن جـدّه=الضحك عن درب ضيق الصدر ماعاجه
غير الغلا والولـه عليـك وش حـدّه=يـادرب ليلـه ويامسـراه وسـراجـه
كنّه يعرفـك قبـل يلقـاك مـن مـدّه=مـع ان مابينـك ومـا بينـه امواجـه
هـواك بـدو ٍ نـووا للقلـب بالشـدّه=ورياض قلبي لشوف البـدو محتاجـه
والوصل..بحر ٍ متى انت بتسمح ابمـدّه=السيف صبري وبحرك شـح بامواجـه
قصيـدي اللـي قريتـه واللـي اعـدّه=قديـم لا يزعلـك معنـاه واخـراجـه
وفراغ قلبي غلاك ارهى علـى سـدّه=ليتك تشوف الغـلا وابراجـه وعاجـه
اقوى ريـاح العـذل مـا تقـدر تهـدّ=الا الجفا لـو تنفـس هـدم ابراجـه
تغانـم الوصـل لـن البعـد لابــدّه=ياتيك في يـوم ثـم ياخـذك بادراجـه
اللي لـي انـك تليـن وتتـرك الشـدّه=واللي لك اني ما سولف بـك لهراجـه
ولاني بزعلان واللـي نرتجـي مـدّه=يا بـاب قلبـي ويـا قفلـه ومزلاجـه
زعلة تغلي ومـن تزعلـه مـن قـدّه=ما دام كـل ٍ يبـي دربـك ومنهاجـه
غالي وتبخـل علـي وتطّـول الصـدّه=الله يسامـح غـلاك ويلعـن الحاجـه