يالله اللي ما خشى غير خوفٍ منك خوف =لا شريك ٍ له بملكه ولا يعبد سواه
فيك تشخيص البصاير ولك مد الكفوف = يا كريم ٍ يكرمون الاكارم من عطاه
عالم اللي ما اعلعمه شايف اللي ما نشوف =خافي ٍ سره والاسرار ما هي بتخفاه
لا جفانا القل واللي روابعهم ضعوف =جعل ربي ما يورينا غضبه ولا جفاه
ولا انقفل باب ٍ من الرزق حراسه وقوف = فتّحت بيبان الارزاق من كل اتجاه
والله اني شره وان هقوتي ترقا الطفوف =مير عيا يستحي الفقر من وجه الغناه
كم تعبنا نحسب الجهد يثمر ومخلوف = وكل مغرسها على قوز ينطحها صفاه
راكب اللي مثل نصبٍ غبش قدم القنوف =شاص لند الفين تشفي على شوفه شفاه
لا اعترض روس الشطرطون قدام معطوف =كالشفق لحمرعلى حد نوّ ٍ من صحاه
فالطعوس البيض يزمي على روس الطنوف =مثل ما تزمي سحال الحليب من الرغاه
منو شغموم ٍ على خدمة الخويا ولوف = ايتغانم شبة النار قدام اخوياه
كن سبيره حبة الخال في عاتق هنوف = لا لقت خطوى عشير ٍ تبين له غلاه
دق سلفه لا انكف الزيت من فوق البلوف = لا قضيت الفرظ الاول وفظت من الصلاه
وأمش من بطن الشقيقه سلمت من الصدوف =ونحره بيت بن ذرعان في بطن الغضاه

بيت شرهين الهقاوي مدلهت ّ الضيوف = مسند اللي لا طلب عونهم وجه ٍ وجاه
عند ابو فارس تريح على بن وخروف = وان نشد مفلح عن العلم قل علمي عفاه
الرجال اتقول ما ينّصا عند الظروف = كود رجال ٍ يسد اللزوم لمن نصاه
ولا يفيد النعم ويسير له بالمدح نوف = كود رجال ٍ يعشق المراجل من صباه