الفرص ماتنتفوت كان جتلك لاتفوت=اغتنم فرصة حياتك قبل ميعاد الممات
ماعلى الدنيا مخلد كل من فيها يموت=طاعة الله مع رسوله هي ثمر كل الحيات
خلها ملبوس نفسك خلها مركب وقوت=تنفعك ساعة وقوفك قدم رب الكاينات
كان فات الفوت قالوا مايفيد تجر صوت=قبل اجل ينبح صوتك بالندم اخذ الوصات
لايضيع العمر كله فى المقاهي والبلوت=عمرك اغلى ماملكته وش تفيد الملهيات
العمر شجره ورقها لاذبل صار محتوت=لو سقيته ماتناما لو نماء كل النبات
ماعلى الدنيا مقام ولاعلى الدنيا ثبوت=ننزل ونرحل وينزل غيرنا خلقٍ شتات
نبني بيوت ونموت وغيرنا يرث البيوت=وان رحل جاء من ورثها هكذا خذها وهات
نوت ماتنفع عقاب ولايفيد عقاب نوت=والغني لو فاض ماله ماتنجيه الغنات
كان ما أنفق من حلاله في شحيحات الوقوت=واستغل المال فى اللي ينفعه عقب الوفات
ارج ربك وابتهله لادعيته فى القنوت=يرزقك طيب الختام ويرزقك حسن الثبات
فالاصل دنياك هاذي مثل عش العنكبوت=مايدوم الها قرار ولايدوم الها ثبات
البنادم دام ما احفى لاجل مولاه السبوت=والله انه والله انه ماعلى عمره طرات
المراجل ماتهيا بالمراكب والبخوت=ولاتهيا بالمناصب والبني المترفات
الرخوم رخوم حتى لو تباهوا بالبشوت=والرجال رجال حتى لو مشوا فقراء حفات
المراجل شبه دره فى البحر في بطن حوت=مايجيها كود رجلٍ ماحسب للكايدات
لو حمى حر الهجير يدوس حره دون بوت=ماحسب حر الهجير ولاعطاه الالتفات
وان طراء للبرد طاري ماحتسى للبرد كوت=زمهرير البرد دونه ماتلحف بالعبات
خير من بعض الكلام اوقات ميلك للسكوت=والكلام اوقات خيرٍ لك من اظهار السكات
كلمةٍ تنفعك قلها ماعليك من الشموت=والكلام اللي يعيبك لاتكلم به بتات
لاتكون بكل وضع وحال رجالٍ صموت=وان هرجت يكون هرجك مايلحقك الشمات
شوت هرجٍ مايفيدك بالقدم لاجاك شوت=لاتسمع له لو أنه جاك من كل الجهات
عشت ياوقت المطايا قبل ميراد الفروت=والله إنا نفتخربك لو سنينك قاسيات
فيك تجمعنا المحبه والحسد ماله نعوت=كل كلمه من رفيقك احلى من نهر الفرات
بس صار اليوم هرجه ياصلك هرج معفوت=يمكن لحضرة جنابك يهرج بسبع اللغات
شجرة الحنظل ثمرها مايجي خوخٍ وتوت=وكل شجرة توت ماتثمر طلع حنظل وقات
عش عزيز النفس حتى لو تهاجر للخبوت=لاتذل النفس مهما تعتريك النايبات
لو بجيبك ماتحصل غير كوم اوراق نوت=عزة النفس وكرمها ماتقدر بالميات