تعبت اقول لضيقتي سهـود ومهـود=اليا متـى هالعـذر بيكـون عـذري
البارحة يـوم اكثـر العالـم رقـود=عادت علي اللي تجي منيـن مـدري
الضيقة اللـي كـل ماراحـت تعـود=مكانهـا مابيـن قلبـي وصــدري
ناسٍ تنام مدهنة فـي دهـن عـود=وناسٍ تنام مدهنـة بزيـت مقـري
لاواهني اللـي حلالـة مـن الـذود=تسعين وضحى كل ماضـاق يسـري
يسـج معهـا كـل ماهبـت النـود=يتبع مسيل السيل في القـاع يجـري
ماهوب مثلي من اقرب الناس مجحود=الله يسامـح مـن طعنـي بظهـري
من راح ماكنه على القـاع موجـود=مايدري انـه اول اسبـاب كسـري
كل ماطرالي قلت مـن قلـت الفـود=ياليـت منهـو راح ماعـاد يطـري
لو تستحي من فعلها ايامـي السـود=كان استحت مبطي ولا طال صبـري
قدمـت بالموجـود لخاطـر الجـود=لين التفـت ولابقـى شـي حـدري
عطيت من عمري ولا شفت مـردود=ياللأسف للنـاس ضيعـت عمـري
واذا افرحوا واجد على طيحة العـود=هذا دليـل انـه فعـل شـي يغـري
بوقف لحالي واتبع الطيـب والـزود=اشره علي ان صغر الوقـت كبـري
ماني على بعض المخاليـق محـدود=امـوت مانزَلـت للنـاس قــدري