نويت مرباع الغضي سيد الاحباب=قصدي يزول الجرح زاد التهابه
جيت وبقايا نارهم حول الاحطاب=وبيت الشعر مطوي وباقي زهابه
اقفت ركايبهم ومني الهدب داب=من دمع يسال وانذهل بالاجابة
على غزير الدمع ضميت الاهداب=صبيت لين الدمع يقفي سحابه
بعض الوجع يمكن تداويه الاعشاب=وبعض الوجع يا ويل منهو سطا به
عشق بدوي لا حب ما هوب بكذاب=يوفي ولو جرحه تجدد صوابه
واليوم وصلت بيننا مثل الاجناب=ذاك الغلا يا ضيعته يا سفا به
باكر الا جينا لهم مثل الاغراب=من عقب ما كنا الاهل والقرابه
الامر لله وكل شي له اسباب=ولا الهوى وش لي على هج بابه
وشلون قلبي ما يجي منه منصاب=على الرجم منقوش بعض الكتابه
حتى اثر مشيه مع سهول وهضاب=مــــر يبين ومر ما ينـــدرابه
قلبي من الفرقا صويب ومرتاب=كنه غدا نصفين من هول ما به
حزني عليه انه تسبب و لا طاب=نظرة طبيبه عجلت في ذهابه
ريح الخزامى والنفل زين الاطياب=ويشدني ريح السمر في ثيابه
لاقبل نسيم الليل له خيل وركاب=وله في طلوع الشمس عز و مهابه