خلي دموعك في عيونك وانا ابكيـك=خلي الحزن لي وانسي الحزن تكفيـن
انا خوي الحزن ما ارضى يخاويـك=ما ابغاك لو خطوه بدربـه تسيريـن
لا لطخـك بالله وشـلـون انقّـيـك=اذا غدينـا فـي ظلامـه مساجـيـن
ذاخـرك لايـام اجيلـك والاقـيـك=في عز لحظـات السعـاده تعيشيـن
لاشفـت بسماتـك تعطـر اشافيـك=والـى سمعتـك يـا حياتـي تهليـن
انسف حزن قلـب ٍ تتبـع خطاويـك=قلـب ٍ طـواه الهـم ذاق الامـريـن
وابي تعذريني ترى ما اقدر اعطيـك=ماغير اباخـذ منـك يابنـت شييـن
اباخـذ همـوم ٍ تعـكـر ليالـيـك=وابقسـم ايـام السعـاده لنصفـيـن
نصف ٍ ونصف النصف الآخر بياديك=واللي بقى بالنصف بقسمـه عشريـن
تسعة عشر لك ياهوى البـال تمليـك=وانا اباخـذ واحـد ٍ كـان ترضيـن
اما العطا ما اكـذب عليـك واخفّيـك=ماعندي الا روحي ان كـان تبغيـن
تفداك روح ٍ هايمـه ياهـوى فيـك=عسـاك فيهـا يـا هواهـا تحسيـن
بعـد السفـر الله يعيـن متحـريـك=على ثـلاث شهـور فيهـا تغيبيـن
ابـوعـدك والله مـانـي بناسـيـك=وابطلبـك يابنـت ليـاك تنسيـن
خلي دموعك في عيونك وانا ابكيـك=خلي الحزن لي وانسي الحزن تكفيـن