لولا الطويله يوم عصر ابديبها=اصبح بضيقة خاطري وامسيبها
لاضاق بالي شاقني مرقابها=اسوق رجلي سوق واعديبها
من هواجيسن تضيق صدري=في ضامري مبغى العرب تدريبها
فالقلب لاهبها وحامي صلوها=ايبس معاليق الحشى لهيبها
ليا زمان الكود مابك حيله=وتدبيرك بيد عالمن في غيبها
وقتن مياله يقطع المنين حده=يلحق رشاه الدلو في قليبها
غيرمسار الناس عن منهجها=الذيب حول والثعل هوذيبها
ورجلن يحكم عقله ابتفكيره=يبلش مابين المخطيه ومصيبها
كانه مجامل فالخطى ويداهن=ثلث العرب هوندها وحريبها
لاصار في غاياتهم ماجامل=الناس عن طاريه تنفض جيبها
ماكنه الا قاطعن حد الله=وغاد العرب وليها حسيبها
ونوع المجالس تختلف برجالها=ولاكل جلسات العرب تحكيبها
ومن لاحسب للكلمه وملفاها=يصبر على اللي كلمته يلويبها
الناس حتى المصطفى تحكيبه=حتى الآيت اللي تلاها اللقيبها
قالوا هذا ساحر وهو من ربه=وقوالهم عبر الوحي يدريبها
وفي ليلة المعراج كذب فيها=وصور له الله صورتن مدريبها
صور له الله صورتن قدامه=لين الطواغيت اتضح تكذيبها
والرجل ماله فالمزاود صالح=لاصار خصمه كلمته يهذيبها
لاصارت الحجه ماتقنع ذاته=خله يبيع الكلمه ويشريبها
ومن لارما فالقوس كيف ايجيده=ويقيم ارماته خطى ومصيبها
ناسن عن المكنون ويش ادراها=وخوافي الغبات ماتدريبها
وانا المحيط اغوص في غباته=ومن الجواهر حصتي واجيبها
ولاقلت قافي فيه وسمن يعرف=في قوت المعنى وفي تركيبها
فضلا من الله لادفعني دافع=ابدع بيوتن تعجب ابتهذيبها
وقولن بلا برهان ماله خانه=لاصار ماله حجتن يدليبها
كم واحدن قال البحر قدامي=واثره سرابن فالسهل يزميبها
صدق حلومه وانخدع باوهامه=صدق خيال النفس ثم وريبها
وتبقى الحقيقه شمسها لو غابت=لابد تشرق من بعد مغيبها
وهداج تيما يفرقه غزيره=جمه بحر ماهو مثل سريبها
والرجل ماهو كل شي ايجيبه=إلا مواقيف العرب يرسيبها
وشين بليا اسباب ماله يمه=ومن بدا في كلمتن يوفيبها