سبع وخمس سنين ياهي مريره=مابين خسف صاب دنياي وكسوف
يوم أنطفت شمس الجزيرة ظهيره=وعني رحل فيصل وجت عجة ظروف
صارت حياتي لكل الأهات ديره=وكنت الحزن كله تعابير وحروف
ودعت أبوي ولابقا لي قلب غيره =الا خفوق كنت به دوم محفوف
حضن الأمان اللي وهبني ضميره =واللي سقاني كل طهر ومعروف
وأصدق شعورلفني في حريره=وأحن صدر ضمني وأعـذب وصوف
أمي ,بكل الأوصاف توصف كبيره=ومن غيرها يقدر يبرد على الجـوف
بنت السمو اللي زهت به مسـيره=وأم الجريح اللي من العمر محـذوف
سبت فجعني والمنايا شطيـره=وحتوف لاحل القدر طاحت سيوف
سبت لحق سبت وتاهت بصيره=ورجعت أون ,وعود الوجه مخطوف
اصيح وأشهق والسعيره سعيره=ويارب صبرني ...يارب ملهوف
فقدتها يارب هدي السريره=ماابتل ريقي,وينها؟ وياضما روف
كن القمر من عقبها مات طيره=وتوشح ثياب الكدر واقبل خسوف
عزا ...وعزتني صفوف كثيره=ومافيهم اللي رد صبح لمكفوف!
ماعادت ديارالسهاري منيره=ظلما هنا وهناك .والباقي طيوف
وذكرى تزلزلني ,ودمعه غزيره=وطفل يتيم هده البعد والخوف
مكسورولاتنفع بكسره جبيره=مقهور ,مابيده ولاشئ , مكتــوف
لبست ثياب أحرام عمره اخيره=وصار الكفن في عرش رب السما يطوف
ربي يتقبل نــيتك يالفقيره=وحنا برجوا خالق العالم ضعوف
يمه:صمت, وموجعات عسيره=وضيقه وراء ضيقه , وهم , وعاصـوف
يمه:وداع ,وخيرة الله خـيره=وفي ذمة الله كلنا بـأرضه ضيوف
أقول وش أقول :راحت (منيره)=يعني فقدت النبض والسمع والشوف