وقلبي اللي بين الاضـلاع جـالا=جولة نعامٍ جال عقـب المقيلـي
جـال وتذيّـر واعتـلاه الجفـالاَ=واقفا مع اوساع الفيافي جفيلـي
ولجت اضلوعي مثل لج المحـالا=على السواني فوق عـدٍّ طويلـي
عليـه سلفـان القبايـل تـتـالا=تواردوا من كـل صـوبٍ نزيلـي
تعاقبن فـوق المحـال الحبـالا=تارد وتصـدر كـل دلـوٍ ثقيلـي
ميرادهـا جــمٍّ قــراحٍ زلالا=ومصدارها تصدرعلى ظهور حيلي
لج المحال ولج صـوت العيـالا=ولجت حنين الخلج معهم تهيلـي
مثلـه يلجّـن الضلـوع النحـالا=والجسم من ماصاب حالي نحيلي
على وليفٍ عن حوالـي يسـالا=وانا على فرقـاه مقـفٍ رحيلـي
عنهم مغيب الشمس سقت الرحالا=واقفيت عن لاما العفيف الجميلي
ايّست من لاما حسيـن الجمـالا=طويت ياسي والرجـا مستحيلـي
من مطلبٍ لاهله قطعـت الجـدالا=مطلب ويكفي عن كثيـر وقليلـي
النفس للمطلـب تحـب وتحـالا=الاّ فـراق الشمـل مايستويلـي
انارجل ممشاي ممشـا الرجـالا=امشي بعـزي والمعـزة دليلـي
لـوإن قلبـي للمحبيـن مــالا=مع كل طاري يـم خلـه يميلـي
يطري على قلبي مليـح الخيـالا=ارعى خياله في نهـاري وليلـي
ارعى خياله مثـل راع الحـلالا=واحن حنين الخلج واعول عويلي
واخايلـه مثـل العـرب للخيـالا=وعيني على وجهت خياله تخيلي
خيال حـيٍّ دونـه اليـاس حـالا=فرقاه ضرتنـي بحالـي وحيلـي
في مامضا رجواه فيهـا مجـالا=واليوم مابااليـاس قـولٍ وقيلـي
رجواه صارت مثل فـيّ الظـلالا=في وسط بستانٍ ظلالـه ظليلـي
مالت غصونه مع نسيم الشمـالا=باثمار طلـعٍ مالوصفـه مثيلـي
يوم استوى بفروع فـيّ الجبـالا=صافٍ هواه ومـاه نبـعٍ يسيلـي
ظلّـل علـيّ بظـل فـيّـه وزالا=من غير شوفه ماحصلّي حصيلي
واطلب من اللي في جلاله تعـالا=يجبر عـزاي وللمحبـه يزيلـي
ويعوضني معط العطايـا الجـزالا=هو اللذي بارزاق خلقـه كفيلـي