مسحت الدمع من عين الغلا لجل الغلا ذباح=وانا احب الدموع اللي تقدر حب غاليها
الا يا عين كفي والبسي دون الغرام وشاح=ترى حب العذارى لازم ان الكبد يكويها
بكيت وهلت ادموع الغرام ولا سمعت نياح=ولا نعلم عن الايام وش تخفي تواليها
انا اللي صابني رمية حبيب ما معاه اسلاح=ولا عنده سلاح خزنته دايم يعبيها
ذبحني في غلاه وهد حيلي ثم صد وراح=عسى ربي يسامحها ولا فيني يجازيها
الا يابنت مانعلم لون اللي يصير امزاح=لكن العين مماشافته منك مكفيها
احس البرق في جوّي وجوّك بالموادع لاح=وكم من غلطةٍ عديتها وانتي نسيتيها
وانا من رايي اتريح وبترك صاحبي يرتاح=وسرعه طايشه وسط البلد نقدر نهديها
وخلينا نروح ونفترق دام القلوب صحاح=علاقه بيننا قبل اتخرب لابد ننهيها
مدام اني طلبتك شئ بعده خاطرك مارتاح=تعالي وش نبي في عشرة هذي تواليها
بدالك جبتلي سبحه وجيبي داخله مفتاح=ابقضي وقتي الباقي بها والنفس اسليها
مدام انك عنيده صاحبك هالك وحيله طاح=ولا يقدر يقوم وخطوته لابد يثنيها
ابا اجبر خاطري يصبر وابا انسى كل شئ راح=انا ماني جبان يموت وجروحه مخفيها
انا ولد الرجال اللي منول لوحو الصيّاح=تعزوو عزوة بين العرب والكل يوحيها
فكيف اصبر على صدك وصدري من فراقك فاح=سواتك معي ماتوقع ولا واحد يسويها
ذبحتيني قتلتيني وبابك دونه المفتاح=ولا يوجد حلول الا مشاعرنا نعزيها
حرام اللي تسوينه بقلب العاشق الميّاح=بعد ماصبح حساباته من اسبابك يصفيها
ولكن بالاخير اقولك دنيا الغرام كفاح=هذا هو مايشينها وهو نفسه محليها