ليه ياقلبي تغافلني وتعشق من وراي=كيف روحي غصب عني فيه صارت مغرمه
ليه ترضى ترتبط بانسان ماوضّح غلاي=مابقى لي غير نبضي وانت مني تحرمه
كل ماشفته يطير الحرف من رعشة شفاي=ليت قلبي شخص واقدر من حياتي أعدمه
القهر.. قدام عيني ومااقدر احكي له هواي=ليتني باحلامه اظهر وارتجل واعلّمه
كلما جيت ابتدي الموضوع أوصل منتهاي=وكلما جيت ابني صروح الأمل صرت اهدمه
يوم حسّ بحيرة عيوني سألني وش بلاي=بس درس الحب صعب وليت قلبه يفهمه
راحت ايام وليالي عشت اردد واشقاي=السهر يعزم عيوني والحزن صرت اعزمه
بس انا لاحظت كيف انه بدا يسهر معاي=صار مثلي وسط صدره سر غالي يكتمه
كان صمته مثل صمتي ورجوته تشبه رجاي=وان رسم شي بخياله في خيالي أرسمه
صار يسرح قلت شكله عاشق ويعشق سواي=لازم ابعد عن حياته ياعسى الله يسلّمه
لين قال الكلمه اللي زلزلت أرضي وسماي=قالها من غير مايشعر بروحٍ معدمه
قال احبك انتي شمسي وانتي همسي ياهناي=قلت احبك انت عمري وانت شعري ملهمه
قال صمت الحب عذّبني وعذبته معاي=قلت صمت الحب يستاهل حبيبي نكرمه
قال لو ماكان علّمتك بحبي وش دواي=قلت من يهوى ويسكت الزمان يعلّمه
