مجالس الفرده - محـــــــاوره

السلام عليكم ورحمة الله وبركاته

شاعر وشاعره جمعهم النصيب وتزوجوا وكان بينهم اتفاق تكون ليلة العرس مختلفه وغير تقليديه ، وان كل منهم يقول أبيات شعر ارتجاليه وقت وجودهم على الكوشه وبطريقة المحاوره ..

دخل العريس على عروسه واهي تنتظره على الكوشه وبدا ينفذ الاتفاق وأول شي رحب بالحاضرات وقال :
مرحبــا ضيفاتنا .. فالفـرح نوّر 000 ياهلا ويا مسهلا بالحاضراتي
ارقصن غنن ولأبي منكن أكثر 000 انفضن سمر الجدايل مايلاتي
الفرح بوجودكن .. يزهى ويفخر 000 دامـه الله نعمـةٍ يالغـاليـاتي

وبعد هالابيات رحب العريس بعروسه وقال :
الفرح فرحين وأنتي الفرح الأكبر .000 ياهلا بك ياعروسي يـا مناتي
قبلة الترحيب ، هاتي الخد الأيسر 000 الشنب يخدش خدود موّرداتي
ربي جمّعنا .. وقــول الله أكبـر 000 شاعـرٍ مع شاعـرة بأحلى غناتي

وجا دور العروس الشاعره وردت على عريسها وقالت :
ياهلا بك واحترم نفسـك تـوّدر 000 وانثبر ساكت ولا تشوف ..البناتـي
فارغٍ قلبك مثـل ذيـبٍ تحدّر 000 يلغف الخرفان في صمت وسكاتي
لا تفكر يعرفن بالشِعْـر الأحمـر 000 ما يبن شعرك .. بنـاتٍ عاقلاتي

ويلتفت العريس على عروسه وأبياتها القويه ويرد :
شينها من ليلةٍ يالوجـه الاقشـر 000 أعقلي يابنت .. خوف من الشماتي
اضحكي قدامهن لو ضحكٍ اصفـر 000 ولا تفردّنا .. تشوفي الطايلاتي
وين عقلك بالشعـر .. راح وتنكـر 000 وين كلمة حـب .. ويـن المفـرداتي

فترد عليه العروس :
تحسبن العرس يالانثـى المذكر 000 مثل شعرك هرج .. صف القافيتي
العرس ... تدخل بعالم مثل تِقبـر 000 ما مضى تنساه تحيى كالرفاتي
المْـــرَهْ بالعنـق .. والأولاد تكبر 000 والعوافي تعقبك فـي كـل آتي

العريس شاف السالفه بتخرب من أولها ، وعروسه بدت تشكي من أول ليله .. فحب يسثيرها وقال واهو يوصف البنات الحاضرات وأم العروس :
شوفي اللي لابسه فستـانٍ اخضـر 000 كنهـا لولـب برقـص المبدعاتي
وشوفي أمك كنهـا كيـسٍ مخصّّر 000 وفرقـي بيـن العجايـز والبناتي
وشوفي المزيون راع الشعر الأشقر 000 واهني الرجل فـي ريـم الفلاتي

وهنا العروس طقت عروقها وشالت الكلافه بينهم .. وردت عليه :
لعنبـو اصـلك تــرى لـو مـا تـدّبـر 000 وتستحي يالشين تقعد في ثباتي
لاصفقك كفين .. اعذر من قد انذر 000 واتركك وحدك وهـج بـلا عباتي
منت رجّـال .. ولـكن ثورٍٍ ازعــر 000 لا حيا .. لا سمت من كل الجهاتي

وتوقف العروس .. وتصيح بعريسها تطلب انه يقوم ويروحون :
هيّا قم .. قامت عصبك ولا تأخـر 000 ناويه أعطيك درسٍ في الصفاتي

ويرد العريس يمازح عروسته :
ماني قايم .. روحي لوحدك ولا أكثر 000 خايفٍ منك تجيبي لـي حماتـي

ويقومون الاثنين وينزلون من الكوشه والعروس تهمس في اذن عريسها :
شخّص ببشتك وراسك فوق أكثر 000 ودنق عيونك .. ومشيك في ثباتي
وامسك بيدي .. وتبسـم ولا تنثّـر 000 ومن قرب حولك تردد .. "ياحياتي "

فيرد العريس بشويش :
من سمع هرجك .. يقول ولا تحذّر 000 ضبي شارد ما خذه ضبٍ نباتي
جعل منتي ذيك أم الشعر الأشقر 000 لا .. وتتشرط علي وجه الدباتي

وتقفل مع العروس وتشين الأخلاق وتمسك نفسها لين وصلوا غرفة النوم .. ثم قالت :
شف ترى مابي مشاكل أو كدر 000 خلنا نِمْرحْ .. قبل وقت الفواتي
هدني الإرهاق ولا احتاج السهر 000 والصبح بدري يهجدوني خواتي

وأبو الشباب يرد عليها .. :
مايصير .. اللي تقولي من عذر 000 ما انــام إلا .. بحل الواجباتي!
وش تقول أمي .. إذا بان الخبر 000 وش أقول لهم ..تلحفت بعباتي!

والعروس تضيق بهالفسيحه وتقول :
لا تطوّلهـا ... وفـكر بالأمر 000 وش دخلهم .. فـي زواج الشاعراتي
وان رفضت أرميك في هذا الممر 000 واقفل الغرفه وطوّل في سباتي

وكما جرت عليه العاده .. يخضع العريس لرغبة عروسه .. ويلتحف ببشته

أرجو أن تحوز على استحسانكم هذه المحاور