صوتٍ سمعته تل قلبي من أقصاه=لولا ضلوعي راح قلبي مع الصوت
لوسمعها اللي ميتٍ قلبه أحياه=يشفي العليل اللي على حفرة الموت
عز الله إني داله البال لولاه=أسهر مثل ولد العواجي على نوت
الله يغض الحب هذي سواياه=والله يلوم اللي يلومون بخّوت
ماكل قلبٍ يدرك اللي تمناه=الحبل ماهو للمحبين مفلوت
أنا اليا شاهدت غرة محياه=والله ما أغبط الي مصيفه في بيروت
لو نجتمع ليل ونهار إفـ مضماه=في ظل غار أحسن من أوتيل ماريوت
وألا على جزرة بحر مالح ماه=من البحر نشرب وناكل من الحوت
وإلا بقطعٍ من الخلا محدٍ جاه=غير الجوازي مابها أزوال وبيوت
هذا هوى القلب وغرامه بديناه=بخدودها وعيونها سحر هاروت
ماتلتفت للي قروشه بمخباه=اللي يحسبون الهوى عقل وبشوت
فيها الجمال اللي قليلة حلاياه=كنه عليها نازلٍ بالبراشوت
لو تطلب حزام الذهب مالقيناه=أقصر من الشبرين وأطول من الفوت
والله ماتصلح حياتي بلياه=لو لحدوني جعلهم في براهوت
نويت أخاطر وأنهبه من دناياه=وأزبن على زبن الدخيل ابن شفلوت
وإن مت بأسبابه يجازيه مولاه=بس إفزعوا لي عند بيته بتابوت