ودك يصير الرجل عـراف وافهيـم=مايقول داري واهو ماهـوب داري
واليا نشد عن شي يستخـدم الميـم=ماشفـت ماعينـت مـالاح طـاري
والطيب من بين النشامـا مقاسيـم=اللي عليهن حمل واللـي عـواري
لاكـن قـل المـال لرجـل تحطيـم=لوكـان يطريلـه ثمانيـن طـاري
عشقن طلع في وادي الهيم للهيـم=دربي يمين ونبت عشبـه يسـاري
ومن صارله حاجه ورى برطم شريم=ينزل لرغباتـه نـزول اضطـراري
ويحطلـه طيبـن مزيـف وترهيـم=مع تحدث فـي سلوكـن حظـاري
ماهو على شانـه يفـك المجاهيـم=له حصتن فـا الآهلـي والتجـاري
وقتن تغير فيـه بعـض المفاهيـم=فيه العدو مثل الصديـق المبـاري
وقل الصحيح وقايله واصـح يانيـم=وساد الكلام اللي من الصح عـاري
الا ويصحـب كلمـة الحـق تعتيـم =فعلا وانا سامـع وشايـف وقـاري
لكن عزيز النفس مايقبـل الضيـم=ماني على الدون والـدون ضـاري
ولا ابغى من الناقص حفاوه وتكريم=لو صرت في بعض الامور انتحاري
اجزع كما تجزع حرارن صواريـم=والخوف ماطول عمـار الحبـاري
للكـل مقـدارن وللـكـل تقيـيـم=ولاني لعميـان البصيـره مـداري
للأسئلـه ياسيـن للأجوبـه جيـم=هـذاك ذاك وذاك ذيـب الغـداري
وعلى الرسول افضل صلاتن وتسليم=شهادتـن لله تشـهـد اجـهـاري