يا دار وين اللي بك العام كاليـــــوم=ما تقل مرك عقب خبري نجوعـــي
خالي جنابك بس يلعي بك البــــــوم=ماكن وقف بك من الناس دوعــــي
شفت الرسوم وصار بالقلب مثلــوم=وهلت من العبرة غرايب دموعــــي
وين الجهام اللي بك العام مـــــردوم=وظعون مع قدرة سلفها تزوعـــــي
أهل الرباع مزبنة كل مضيــــــــــوم=واهل الرماح مظافرين الدروعــــي
راحوا لنا عدوان وحنا لهم قـــــــوم=ولا ظنتي عقب التفرق رجوعــــــي
وان صاح صياحن من الضد مزحوم=تجيك دقلات السبايا فزوعــــــــــــي
صفرن يكاظمن الأعنه بهــــــن زوم=يخلن سكران المجانين يوعــــــــــي
يركب عليهن باللقى كل شغمـــــــوم=فريس والله ما تهاب الجموعـــــــي
خيالهم ينطح من الخيل حثلـــــــــوم=الاسنه بالنشامى شروعــــــــي
ويا شيخ انا عندك معزز ومحشــوم=ويمضي علي العام كنه سبوعــــــي
لا شك قلبي بالوفا صار ماســـــــوم=لربعي ونا يا شيخ منهم جزوعــــي
وعيني لشوف الحيف ما تقبل النوم=والقلب يجزع بين هدف الضلوعــي
ويا شيخ ابا وصفك يا مفني الكــوم=يالصاطي القطاع حسن الطبوعــــي
حلياك حر يفني الصيد ملحـــــــــوم=متفهق الجنحان حر قطوعــــــــــي
حر علم بالصيد من غير تعلــــــــوم=يودع بداد الريش شت مزوعــــــي