يا جاهل(ن) مر الزمـان وحلاتـه=خذ هاك عقلي مانفعنـي ولا بيـه
في هالزمان الطيب اعلـن وفاتـه=الطِيب مات وكـل طيّـب يعزيـه
يرحمك ياعود(ن)حفظ لك وصاتـه=يبيك تتبـع ساقتـه مـا تخليـه
علمك سيـات الزمـن وإحسناتـه=يامرك بالمعروف ليتـك تماشيـه
الله وهبنا ديـن واحسـن صفاتـه=وانزل لنا التشريع واجزل معانيـه
الحـق والباطـل عرفنـا جهاتـه=وما يزرع المخلوق له يوم يجنيـه
أحد(ن) له الدنيا على الكيف جاته=الله عطاه وكـل شيـن بـاياديـه
ما ذاق لوعات الزمـان وشقاتـه=الفقر والتجويـع يسمـع بطاريـه
وأحد(ن) يدور في زمانـه نجاتـه=يبي الستر والعافيه بيـن اهاليـه
عزيـز نفـس ولا يبـدّل عباتـه=راضي ويدري عيشته مـا تكفّيـه
أحد(ن) ربا ماخذ طبايـع خواتـه=ضعيف رآي وكلمتـه مـا تقديـه
وأحد(ن) لبس ثوب المراجل بذاته=واسِعد عين اللي من الضيق ناصيه
وأحد(ن) صميدع يرهبك بـإلتفاته=حر(ن) مطالعيه عن الناس تغنيـه
وأحد(ن) يضيع صيدته من عماته=لا واخسارة مـن ترجّـى يعشيـه
وأحد(ن) زرع ما نال غير الحتاته=الحظ كنه واقـف(ن) لـه معاديـه
وأحد(ن) قطف ورد الزمن وإثمراته=باب البخت مفتوح دايـم يناديـه
وأحد(ن) تساوى في حياته مماتـه=وأحد(ن) يموت وطيّب الذكر يحييه
الوقت لو يومي عليـك بعصاتـه=ماهي غريبه منه هـذي مماشيـه
يابوي هات اللي يجي منك هاتـه=راضين باللـي ماتكنـه وتخفيـه