ليت جرحي بالعلاج والقرايـه يرقـا=مير جرحي مزمنن يحتار بـه دكتـوره
واهنيك في حياتـك بالهنـا يالورقـا=واهنيك تلعبين السامـري مسـروره
واهنيك ماانكوى قلبك بنـار الفرقـا=ولاحنى الهجران حالك حنية الباكـوره
ولا غرق جيبك وكمك من هميل الزرقا=ولا انتبهتي هود ليل الكرى مذعـوره
ولا سرابك هاجس الخلان غرب وشرقا=من هزيع الليل لين الصبح يبدي نوره
مثل من دنياه بالحيلـه درقتـه درقـا=من كثر غاراتها ضـده تهشـم زوره
في النحر فرسانها دايم طعنهـم زرقـا=وصار جيشه منهزم وجيوشها منصوره
ما مرادي من هوى خطو العنود الطرقا=لو تبين قدمـي المكيـاج والحمـــــــوره
حالي اللي سمها والـي سرقهـا سرقـا=شوف دار كانت بسكانهـا معمــــوره
يوم اسير في ربوع اوطان روق وبرقـا=شوفها يحزن بعـد سكانهـا مهجــــوره
منهم اللي هاجروا بديار حضر الورقـا=ومنهم اللي في ثراها اجسامهم مقبوره
ما بقي في مرحهم غير الشنون الحرقـا=والاثافي والرحى والبرمـه المكســـوره
كل ما اشتاق لمباديها المنيفـه وارقـا=قام فلــم الذاكره قدامي يعيد الصـوره
وانزل وجيبي وكمي من دموعي غرقـا=ولو تعل العين الارض بدمعها معـذوره
ليت ذكرى ذكرها في وسط جوفي عرقا=تنمـــحي مثل الطباشيره مـن السبـوره
وليت جرحي بالعلاج والقرايـه يرقـا=مير جرحي مزمنن يحتار بـه دكتـوره