هيّض ابن حصيص في تالي نهاره=الف قافٍ من ضميرة مدلجاتي
ياوجودي وجده مكسور الجبارة=آخذٍ تسعين ليلة مايباتي
أووجود اللي خذ الحاكم دياره=خذ حلاله والحريم مسلباتي
عقب ماهو تاجر وراعي أماره=صار فلاّحٍ واموره هيّناتي
ارتحل ياحمود منبوز الفقاره=آركي وحبال كوره كالفاتي
آركي ومربِّعٍ عشب القراره=ما علاه الشدّ من عشر سنُواتي
ديرة بن دايل مافيها صقاره=كود شيبانٍ وعجزٍ مدبحاتي
من خشوم كميت الى حدّ الزبارة=جعل تمحل والوشوم مربّعاتي
صاحبي ( بالوقف ) مدهاله وداره=ماسكن في ثرمدا والا مراتي
ولّعتني بالهوى والحبّ ساره=دلّهتني عن غنادير البناتي
ياحسايف بنت بن سلوم ساره=عند ابوها تدّرج مثل المهاتي
خدساره مثل شكر في غضاره=أو حليب ابكار عرب مسمناتي
و(.........)في دعب قاره=في محير الما القراح مصلّعاتي
والثنايا قحويانٍ في زباره=زاهي نبته على كل النباتي
راس ساره ذيل شقراً وسط غاره=والجدايل بالرشوش مجدلاتي
والمطوّع لو يشوف خديد ساره=طبّق المصحف وعجّل بالصلاتي
ماذكر جارٍ ذبح بالحبّ جاره=بالمبيسم والثنايا المرهفاتي
حالفٍ بالله ما أنسى حبّ ساره =كود أهل شقراء يخلون الصلاتي
لايمي يعطي حنيشٍ في خباره=سمّها يشظى العظام الصالباتي