مجالس الفرده - ياوجودي وجد من طواه وقته بالهمومي زاكي علي الحربي

ياوجودي وجد من طواه وقته بالهمومي
لين عاف اللي يوده طول عمره في ثواني
وياوجودي وجد عود ماحصله مايرومي
مايطولنه يديه ولاجزع ماله عواني
وياوجودي وجد عود مايشوف ولايقومي
واتركوه الخايبين وقفوا ابعلمن بياني
لوينادي ماسمعوه ولايجونه لو يومي
ماجداه الا العباير هلها بذاك المكاني
لين مات وعادوا اعياله يريدون القسومي
طول عمره في شقى مايدري ان العمر فاني
وياوجودي وجد عود ماتريح لو يومي
بين حظ مايقوم وبين راي دوم داني
وياوجودي وجد رجل لابته ماهم قرومي
ضاع حقه قدم عينه امن الاول بيد ثاني
وياوجودي وجد ورع مايشيل الا الغمومي
ماتت امه ثم ابوه ومات جده والخواني
بدار غربه بين ناس مايعرفون السلومي
بين كفر وبين شرك وبين هد للمباني
هذا وجدي في يمومه من مايمومه يمومي
أخلفوه أهل النمايم لين من قلبه نساني
أخلفوه أهل النفاق ملفقين اله العلومي
مادراء اني مانسيته لو قصاني ما قصاني
بنت شيخ بالمواقف وافي وقت اللزومي
درع ربعه سيف ربعه يوم صكات الزماني
ماهوا اللي لاحداه الوقت بانت به ثلومي
ماينومس من نخاه ولايكمل بالمعاني
قلب خلك يالطيف الروح فجنه سهومي
من سهومك يالفراق ومن سهومك يالزماني
ليتها وقت العزاوي والنخاوي والعزومي
ماحسبنا للفلاني والفلاني والفلاني
واليوم انا اتعبت رجلي بين سجات الرجومي
على رجمي أتردد مثل ردات السواني

من كلمات وأداء الشاعر زاكي علي الحربي والهندسة الصوتيه والتقديم عبدالعزيز الجهني