تعبت اعبر بالورق والمكاتيب=يمكن اسلي خاطري بالكتابه
وابدع معاني صاغها الفكر ترتيب=تشرح خوافي ظامري بالتهابه
من جور وقتن مارحم حالة الذيب=لو هو عوا مايستمع مادرابه
عز الرخوم اللي تربت على العيب=نقالة الهرجه سواة الكلابه
اللي سعوا بين القريبين تخريب=وتبالشوا من عقبها بالطلابه
اصغار عقل ولو يبن بهم شيب=لوهم رجالن مامشوا بالعيابه
من واقع الدنيا وكثر التجاريب=هات السؤال ودوك مني اجابه
ان كانه الدنيا تولتك تعذيب=منهو سلم ياصاحبي من عذابه
دنيا تدور وفعلها كالدواليب=ياويل منهو همها قد سطابه
ياصاحبي اضحك ولوهي معاطيب=اجروح قلبك لاتبين صوابه
خلك كما حيدن طويل المراقيب=من طول حده عانقته السحابه
واعرف دروب المرجله والمواجيب=ماداسها كود الرجال الذيابه
ومن يدفع الشينه يحصل بها طيب=اخير من بغض الاهل والقرابه
والثقل بير وصافين بالمشاريب=احفظ لسانك تحتفظ بالمهابه
والجار والعاني وايضا الاصاحيب=وصابهم دين النبي والصحابه
احذر على الصاحب تزيد العذاريب=انصح خويك في سلوب الحبابه
واعرف ترى لازارتك شارة الريب=راع الامانه ينذرك من حسابه
ادع الذي هو يعطي العبد ويجيب=ربن كريم ولاتسكر ابوابه
يقسم لك الجنه ويقضي المطاليب=وياقاك من نارن عظيم اشتبابه
تم الجواب ونختمه بالتراحيب=والله يفرج همكم والكابه