مجالس الفرده - بشق صــــدري

بشق صدري

كانك تبـي تعـرف حبيبـي غلاتـك
باشقّ لك صـدري كرامـة واوريـك

تبغى علومك ؟ ذي علومـك وجاتـك
بخير عايـش فـي خفـوق ٍ يداريـك

فيه الغـلا لحافـك وشوقـه مباتـك
نام و تطمـن مابـه احـدن حواليـك

الجـو ماطـر فيـه وازهـر نباتـك
يسقيه من طهر السّحايـب و يسقيـك

يسقيك حب ٍ وانـت يالـروح هاتـك
هاتك تبيـه العمـر كلـه ونـا ابيـك

القلب يعشب حـبّ لاحمـت وطاتـك
ويقفز جبل لو جات ريح ٍ لا راضيـك

قلبـي حِمـاك ودمّ قلبـي حُمـاتـك
اسرح وامـرح يالغـلا فـي بواديـك

ارقّ الرّجوم ومن ضلوعـي عصاتـك
وعروق جسمي لـك قصيـدٍ يسلّيـك

مابه سواك وشـور عقلـي . حلاتـك
ما تمرّك الضيقـة وروحـي بكفّيـك

بنيت لك قلبـي وطـن مـن صفاتـك
محمي , عزيز , وشامخ ٍ شوف عينيك

لـك مملكـة مـا كنّـه إلا سمـاتـك
طهر وْ وفاء عمَّـر بيدينـه مبانيـك

ياللي فـلا ذات ٍ مثـل طيْـب ذاتـك
ماهو بنـا مْزكيـك , ربّـي مزكيـك

قلبـي فنالـك ثـم حيابـك ومـاتـك
وعوّد حيا ثم مات ثمِّـن حيـا فيـك

اعطيت لك قلبـي مسـوي , سواتـك
وعمري عسى انّه بس ياليت يكفيـك

لله درّك حـافـظ ٍ لــك وصـاتـك
ولا أنت ما يحتاج بـاذن الله اوصّيـك

ادعي بصلاتي لك . وتـدع ِ بصلاتـك
يرضـى عـلـي الله والله يرضـيـك

و يزيـدك الحسنـات , أو سيّئـاتـك
اكبر خطاياك الطهـر فـي مواضيـك

لا مرّني طيفـك مـن اربـع جهاتـك
تضحك لي الدّنيا ونـا معْـك أحاكيـك

اشـمّ روحـك وآتحـلـوا حـلاتـك
وراسك على صدري اضمّـه وادّفيـك

ويلا ذكرت المـوت يطـري شتاتـك
ابكيك ويالله يا عسانـي فـلا ابكيـك

ابغيـك بالدنيـا غنـاتـي غنـاتـك
والجنّة ابغى ادخل لها ممسـك ايديـك

إن متّ قبلـك بـس عطنـي عباتـك
ايّات شيء ٍ منْك لا صرت مـا اجيـك

وإن متّ قبلي متّ انـا مـع وفاتـك
بنزل معك للموت حالـف مـا اخليـك

بغيـت تعـرف يـا حبيبـي غلاتـك
وشقّيت لك صـدري علشـان اوريـك

وسلامكم