تكـررت عقـب البطـا والتقينـا
من عقب مامرن سنيـنٍ طويـلات
في صدفةٍ فيهـا حشـا مادرينـا
ولاهقينـا نلتقـي عقـب مافـات
لاشـك جابتهـا الليالـي وجينـا
رغم الفراق ورغم ذيك المسافـات
في موقٍـف بـان التوتـر علينـا
لحظه تلين إبها القلوب القويـات
قالت شلونك قلـت ربـك عوينـا
الحمد لله عاضني عقـب لوعـات
الله رزقنـي فـي هنـوفٍ تبينـا
احيت خفوقٍ كان بعـداد الأمـوات
هي نور عيني فرحتـي والضنينـا
ألقابها عن ضيقة الصدر سجـات
قالت سليت وقلت عقبـك سلينـا
لكن عقب مالاعنا الحـب مـرات
قالـت شلـون وقلـت لاتسألينـا
مافات فات ولا تفيـد الحسوفـات
قالت تكلـم قلـت مهمـا حكينـا
الدمـع ماينفـع عزيزٍليـا مـات
قالـت نسيـت وقلـت لامانسينـا
لكن قنعنا والقناعـه مـن الـذات
قالت أروح وقلت وش فـي يدينـا
روحي عسى في كل خطوه سلامات
بصبر على فرقـاك مهمـا حيينـا
ولا تشـوه صـادق الحـب زلات
قالت علـى ماكنـت دنيـا ودينـا
تكرم ونكرم عـن دروبٍ رديـات
قلت اسمحيلـي قبـل لاترحلينـا
يم الديـار اللـي علينـا بعيـدات
تـراي ذخـرٍ لاحدتـك السنيـنـا
اجيك مهما واجهتنـي صعوبـات
من اليوم اخوك وغيرها ما بغينـا
كلي فداك ان صار بالوقت ميـلات
وتبسمت بإعجاب مـدري حنينـا
وتهشمت قـدام عينـي بعبـرات
قالـت فمـان الله قلـت انتهينـا
وقفت تكلم نفسها بـس بسكـات
وقفـت تقديـرٍ لهـا ثـم مشينـا
دربٍ مشوه اهل القلوب العفيفـات
امشـي واردد ليتنـا ماالتقيـنـا
وش جابها عقب السنين الطويلات
أجيك مهما واجهتني صعوبات 
العرض الشجري
