لايـومـي بـيـوم ٍ ولا لـيـلـي بـلـيـل = ولا السّعـد مقبـل ولا الـهـم زايــل
ماغيـر ازم همـوم واحـط واشـيـل = ولاراح منـهـا هــم جـالـه بـدايــل
تدرون يالعربـان وشهـي البهاذيـل = فرقى وليـف وحـظ مامـن صمايـل
الوصـل نعمـه والمفـارق غرابيـل = يـاحــظ لـيـتـك تـعـتـدل ماتـمـايـل
لامـن بغيـت اعدّلـك ترجـع تمـيـل = كنّـك تقـول اعيـش وامـوت مـايـل
والمهـرة اللـي ماتعيّـن مـع الخـيـل = من دونها تقصـر جميـع الأصايـل
من دونها ضاعت عقول الحلاحيل = وتضاربـت فيـهـا سـلـوم القبـايـل
ياشيب عيني يوم قفّـت وانـا اخيـل = دموعهـا وبـلٍ عـلـى الـخـد سـايـل
وانا اتصبّر وازهم العقـل والحيـل = والقلـب يشكـي للضلـوع النحـايـل
اصبر مثل صبر الرجال المشاكيل = واخبّـي جـروح الـزمـن واتحـايـل
لن الردي والهيس وخبل الرجاجيل = تفـرح لا ورانـي الزمـان الهوايـل
وانا اترفـع واتـرك القـال والقيـل = واجبر عزى قلبٍ على الموت آيـل
وشب نار الشوق وارهي المعاميل = واريّـح اعصـابـي بـبـدع المثـايـل
ولاّ الغـلا ماعـاد يحـتـاج تفصـيـل = لـنّـه مـوريـنـي نـجــوم الـقـوايـل
ياللـي غيابـك حـط بالقلـب تنكـيـل = ويلـي علـى قربـك ولانـي بطـايـل
لاغـاب صوتـك ماتفيـد المراسيـل = وفـر علـى الجـوال كثـر الرسايـل
والله لــو تـاخــذ لـدمــي تحـالـيـل = تلقـاك بالجينـات صـايـل وجـايـل
حبك تعـدى حـب الاكـراد لأربيـل = الاّ تـعـدى حـــب شـمــر لـحـايـل
صبيت حبك مثـل صـب الفناجيـل = وين الجليله تشـرب اشـواق وايـل
ياللي تواعدني مـن اسهيـل لسهيـل = والشـوق فـي قلبـي مسـوي عمايـل
ليتـك تبادلنـي الغـلا والمواصـيـل = وتـرد لـي بعـض الوفـا والجمـايـل
تعبت من قولـة ظـروف وعراقيـل = وتعبـت مـن قولـة ياقـل الوسـايـل
غديـت انـا ويــاك مـثـل المهابـيـل = واشباهـنـا فالـوقـت هــذا قـلايــل
لاقلت انـا احبـك ومشتـاق بالحيـل = تقول لي جعـل العـوض فالموبايـل
كـذاب مـن قـال المحـبـه تساهـيـل = راحـو ضحيتـهـا عـيـال الحمـايـل

قصيدة منقوله للإمانه وإهداء مني لإهل القلوب الخضراء