قصيدة اتمنى ان تنال اعجابكم ابياتها الرائعة للشاعر/مبارك فايز المحمدي

بعض العرب لامن هرج هرجه اكبار = وليا تكلـم قلـت وش ذا الوليـده
وليا بخصته لينه أنجس من الفـار = الحقد فـي قلبـه ونفسـه زهيـده
يمشي على وجهين بلسـان مكّـار = علم(ن) ينقص به والآخـر يزيـده
عنده علوم اطوال ويدينـه اقصـار = ويفرح ليا من حصّل اللـي يريـده
ويصور اللي باقي(ن) مابعد صـار = وكثر التَمدّح مالي(ن) به رصيـده
الطِيّب راح يمين وهو دربه ايسـار = متسلـح(ن) بعقـال ولّا جـريـده
وليا كذب له كذبة(ن) مالهـا عيـار = قام ايتخطف مخـرج(ن) يستفيـده
وسط المجالس عنده لسـان ثرثـار = يالله عسى الثعبان الأسود يصيـده
الطِيب ماله عنـد الأنـذال مقـدار = وأهـل القلـوب الميتـات البليـده
يالله عسى الأنذال بقصف الأعمـار = وأهل النمامـه والعلـوم النكيـده
من شان مايحصل على العالم أضرار = اللـي قريِّـب دارهـم والبعـيـده
والله يساعد كاسب الطِيـب والكـار = وأهل النوايـا الطيّبـات الحميـده
اللي تعز الضيـف وتقـدر الجـار = وقت المعانـد بالمواقـف عنيـده
اللي يطبون الخطر وقـت الأخطـار = أهـل العلـوم الطيبـات المجيـده
ترا الردي غـدار والوقـت غـدار = وتـرا الليالـي لينـات وشـديـده
الله يسترنـا مـن الفقـر والعـار = وأجعل لنا يالله حيـاة(ن) سعيـده
وأستر علينا ياولـي وأنـت ستَّـار = وأجعل وفاة النفس عندك شهيـده
والناس صارت تالي الوقت شعَّـار = والفرق يطلع في معانـي القصيـده
وصلاة ربي عـدّ همَّـال الأمطـار = على نبـي(ن) نعتقـد بـه عقيـده

وسط المجالس عنده لسان ثرثار ++++++++++يالله عسى الثعبان الأسود يصيده