سريا قلم مالي على الصبـر طاقـه=صبرٍ تعدى الحد مـا عـاد ينطـاق
اكتـب لمثلـي قصتـه واشتيـاقـه=في خطك الواضح على بيض الأرواق
قصة حزيـن صافـي المـر ذاقـه=ليا ذكر ما صار له خاطـره ضـاق
باقوا به الأصحـاب والوقـت باقـه=وصار الضحية بيـن بايـق وبـواق
يمشي وهو ما حس في كسر ساقـه=أمسى على ساقين وأصبح على ساق
وهذي سوات الوقت شين اصطفاقـه=والوقت لو يصفـي لـك أيـام دراق
إن شان قطع عنـك كـل العلاقـه=وان زان خلى لك مع الناس عشـاق
ومن شان معه الوقت قلـوا رفاقـه=راحت حياتـه كلهـا هـم واقـلاق
والله خلـق خلـق تحـب اللبـاقـه=كما خلق له خلق ما عندها اخـلاق
أحـد يعيـش بخيـر واحـد بفاقـه=واحـد يعشـق أيـام ويـام يتعـاق
واحد معه حكمـة وصبـر ورواقـه=سبحـان منهـو للمخاليـق خـلاق
لكن يا مـن معـك عقـل ووثاقـه=ابنصحـك كانـك للأمثـال تشتـاق
لا تنخـدع بأهـل العلـوم الرقاقـه=اللـي سوالفهـم توهـق تـوهـاق
صـادق رجـال يعرفـون الصداقـه=يقفون صفك يوم يبسـات الاريـاق
ومن رغب في فرقاك فأرغب فراقه=جاز الذي يجـزاك بفـراق بفـراق
وتعلـم التعشيـق قبـل السـواقـه=ولا تحسبنـك بالدركسـون سـواق
ورزقك يجيك بدون تحضـر بطاقـه=وعند الله المعبـود تقسيـم الأرزاق
يقولها اللـي جايـر الوقـت عاقـه=ولا زال في غيبوبه الهم مـا فـاق
مـن انعزاقـه بـنـادي بنعـزاقـه=واللي يوده صار شوفـه بالأشفـاق
ولا قال هذا القـول قصـده طفاقـه=ما قال هذا غير من نـار الأشـواق

الشاعر : عبدالله باتل الرشيدي
القصيدة نقلها للمجالس العضو f15

المشاركة الأصلية كتبت بواسطة منصور الوسوس (المشاركة 107423) ابن مطيع حياك الله على مرورك العاطر والشكر موصول للاخ f15