يا محاولين ادخال بعض التضاريس=فالشعر لاتخطون بمعادلاته
تعوذوا من طفرة الشك وابليس=لاتقتلونه في مبادي حياته
قد يحدث الشيطان بعض الوساويس=عند الموصى ويتجاوز وصاته
ويا سالكين الطرق فيها تغاريس=ما يدري الرجال من حيث جاته
الشعر الاول له حصون ومتاريس=تمنع جماله عن تجاوز عداته
الشعر ينكر خاملات البرابيس=اللي يجنب نطقها مفرداته
لا تمزجون العود بعطور باريس=يفسد جمال العود في حد ذاته
واللي يحاول يلبس الثوب ما قيس=ينصح رفيقه لا يسوي سواته
يا منكسين امعرب الشعر تنكيس=لاتنكسونه وتفجر لهاته
الله على ذيك السنين المراميس=يوم النشيد اللي قليل حتاته
يوم النبات الزين والقفر ما ديس=يقطف زهوره من يراعي نباته
يوم القنص والطير والخيل والعيس=ياتي لها عند الرجال التفاته
يا اهل الوفا يا كاسبين النواميس=ردوا لنا ذاك التراث وصفاته
لا يندثر ويضيع بين الجواسيس=اللي يبوقون النشيد وبناته
بناته اللي تلمس القلب تلميس=تنعش بمكنون الفؤاد احركاته
ويا عاملين البن وسط التراميس=لا تقطعونه من حشا مرضعاته
ردوه لامات الخشوم المقاويس=صفر الدلال اللي عليها حلاته
ما عاد شفنا البن وسط المحاميس=يحمس وصوت النجر طول سكاته
وصارت لغتنا بين فرس وفرنسيس=خشت عليها مفردات الشماته
واللي يلبس منطق الضاد تلبيس=من حقنا نكشف سراير غطاته
اما يدرس منطق الضاد تدريس=بالحيل حتى يستطيع اكلماته
ولا يخلي زمة غليس فالكيس=يكفي العرب شره وفزعة غناته
ومن يرتجي مد اليدين المفاليس=تفلس يديه ومطلب الخير فاته
والشعر له تفكير ناس فواعيس=تقطف غرانيق الورق من عضاته

المشاركة الأصلية كتبت بواسطة نوااف االدغيشمي (المشاركة 104832) والله قصيدة جميلة صح لسان شاعر ها وشكرا حار لك قرناس على حسن الاختيار المناسب الموفق بإذن الله ودمت لنا مبدع