رجم الهوى اللي لعـن كوثـر جماهيـره = عـز الله أنّـه مايستاهـل تعـب ساقـي
أتعبتهـا فــي مراقـيـه ومشـاويـره = ذي جرتي نـازل .. وذي جرتـي راقـي
لبيه يا (سـاره) .. ولبيـه يـا (منيـره) = في مهبل الناس مدري ويش أنا لاقـي !!
صـدر الشمالـي عليهـن فـك أزاريـره = اللـي مـن آدم وحـوّا مابعـد ضاقـي
جن المدينـه علـى غفلـه مـن الديـره = وتورّطـن بالرومنسـيّـه والأشـواقـي
مايكتـبـنّ أساميـهـن بالطبـاشـيـره = بيعلمنّـك عـن الموضـه والأذواقـي !!
وجيههـن طالعـات مــن الكوافـيـره = من كثر الألوان كنْهـا (سبحـة عراقـي)
مافيـه داعـي أجاملـهـن بتكشـيـره = وأقول مشتاق .. لـو مانيـب مشتاقـي
ماهن بكفو السهر .. والحزن .. والغيـره = ودموعي .. وشعري الموزون .. وأوراقي
(كرت أحمر) و (باب طيّاره) و (تسفيـره) = في (قلعة الوادريـن) و (بألـف طقّاقـي)
الهنـدي و وايتـه !! والعـود وبعيـره = هـذا مـدوّر ذهيـب !! وذاك سـوّاقـي
لو ما أنصفتني سنيـن العمـر الآخيـره = ماطبّقت عينـي أحداقـي علـى أحداقـي
قفلت سيـرة علاقـات .. وبـدت سيـره = اللـي عليهـا الكـلام وهقـوة الهاقـي
أبرك ضيوف الهوى !! وأغلى مساييـره = ريحانـةٍ تقطـف اللهفـه مـن أعماقـي
ماهيب من قوم : (ابو دقّـه وتسكيـره) = من قوم : (لاحاسبـت ماتاخـذ الباقـي)
لهـا علـى الزيـن تهليلـه وتكبـيـره = أنعم من الـورده اللـي فـأوّل الساقـي
مهيـب أميـره لكنْهـا جنـب الآميـره = ذات الحسب والنسب والمستـوى الراقـي
من (أغنياء الرياض) ومـن (هواميـره) = شركات أبوهـا بضايعهـا فالأسواقـي !!
يومي لهـا الغصـن وتغنّـي عصافيـره = والأمـر ينقـاد لرضـاهـا وينسـاقـي
غيداءٍ سهـم عينهـا مـن قـوّ تأثيـره = مخسرٍ سـوق الأسهـم عنـد الإغلاقـي
البـدي والهيكـل اللـي ماتبـي غيـره = (أصطب) و (أستبنتين) و (قير علاقي) !!
مازيّـن أخـلاقـي الـطـب بعقاقـيـره = لـولا عقاقيـرهـا مـازانـت أخـلاقـي
من قبلها الحـظ مـن جفـره لدحديـره = ليـن أوعـزت للزمـان وحـرر وثاقـي
وأعتضت عن قوم : (ابو دقّه وتسكيـره) = باللي : (ليـا حاسبـت ماتاخـذ الباقـي)