لاوالله الاّ قـام حـظ المكيـنـه=وقامت تخاطَفْها يديـن الزبايـن
وصارت بعين الناس سِلْعه ثمينه=إيرَوّجِ لْهـا والخلايـق تعايـن
وسوّامها فالسوق يرطن رطينـه=ومديونها أصبح مع الناس دايـن
وفي وصفها ضاعت عقولٍ فطينه=وقامت تفتّش بين سمر المكايـن
عَنْ وحّدَه سمرا ولاهـي متينـه=انْحيّفـه فيهـا تِبيـن البوايـن
في جنبها وشم الأسـد ناقشينـه=امْكَشّر الأنياب والوجـه شايـن
ومابين إبْرتها وبـاب الخزينـه=مابـان للجـوال والبـرج بايـن
وموديلها المعروف قفّت سنينـه=مبْطي من ايّام الهلـل والكبايـن
ويامَنْ على ( سنجر ) يفرّك يدينه=وودّه يسابق في سباق المزايـن
الزيبـق اللـي دوّخِ مْدوّريـنـه=فََرّحْ قلوب اهل الحسد والضغاين
اتْشيّـع انّـه فالمكينـه رهينـه=وحنا لِمطْلِقْة الإشاعـه رهايـن
عالم غريب ونَصْب واضح بعينه=لو روّجوا له فالقـرى والمدايـن
ويبْقى شهر ابريـل يامصدّقينـه=تَكْبر به الكذبه وترجـع هوايـن
هذي الحقيقه عقب شفنا المكينـه=قامت تخاطَفْهـا يديـن الزبايـن