ليت شحّاد الغـرام يفكنـي مـن شـره=لا يسـوي دلّتـه عـنـدي ولا بــرّاده
والغـرام الصـح ياالعـشـاق .. لله دره=لا ولا يمكن يجي بين القلـوب شحـاده
كان مايفتح زرار الثـوب وانـت تـزره=لاتعـدّه حُـب ، عِـدّه حاجـةٍ معتـاده
والبحر مليـان حـوت.. ولا بـه الا دُرّه=قادت الخفاق غصب وجات لـه منقـاده
كل عرقٍ من عروقي فيـه منهـا جُـرّه=وكـل ذرّه مـن خلاياهـا عليـه قـلاده
كـل ذرّه ! ايـه حـتـى كــل ذرّة ذرّه=ويمكن ان بالغت اقول ارواحنـا سـدّاده
ودي احكي لك عن اللي صار فآخر مـرّه=بيـن ابـن زيـدون والمستكفيـه ولاّده
قالت : غيابك مسوّي وسط صدري حَـرّه=قلت : صدري لين ذلحينه مااعرف بـلاده
قالت : حضورك يطيّر خافقـي ويسُـرّه=قلت : وحضورك تزاحم فالعروق اعيـاده
قالت : تصدق ؟ معاك احس روحي حُرّه=قلت : اصدق .. بس انا حُرّ وبدون سياده
قالت : انت السكّر اللي فالحيـاه المُـرّه=قلت : وانتي ماانتي بسكر .. حياه زياده
قالت : انت الما وقلبي ياهـواي الجَـرّه=قلت : وانتـي غيـم للبيـدا وانـا ورّاده
كل مامريتي بْعـرق .. القصيـد يمـره=يتبعـك ويلقّـط القيـصـوم فـالـزوّاده
شاعرك مغرور شعر وماش شـي يغـرّه=الفكر ريشـة قصيـدِه والشعـور مـداده
كنه اللي فوق شوك .. وكل هـم يجـرّه=لا تخلى عـن عنـاه ولا تركـه عنـاده
عايشٍ في وقت داخل فـي شعيـره بُـرّه=مات فيه .. وكل ليلـه ينتظـر ميـلاده
بيّح امن اقصى صناديق الجواهـر سـره=لين زادوا عـن حيـاه العالـم النشّـاده
ضاق به بحره وفاضت موجته في بَـرّه=وانتثر لولـه ومرجانـه بصـدر الغـاده
لين يبست حاجته في نفسـه المخضـرّه=ثـم نـادى ياعيـون الكـون ياصيـاده
ليت شحاد الغـرام يفكنـي مـن شـره=لايسـوي دلتـه عـنـدي ولا بــراده