مجالس الفرده - اول امراءة تقول قصائد في السيارات

هي الشاعرة بخوت المرية

حبيت ان انقل هذه القصائد المعروفة غالبا عند اكثر الناس الى هذه المجالس العامرة بإهلها

حن قلبي حن (( ماك )) على سمر العجل

عشق السواق والدرب ممسوكٍ وراه

إن عطا مع طلعةٍ عشقوا له الدبل

وإن تسهل ريحه لين ياصل منتهاه

ما بشفي لا دريول ولا ريس عمل

شفي اللي كل ماشاف براقٍ رعاه

صبي أهله قطينٍ على عدٍ جاله عبل

طيبٍ للبل وراعيه مايقطع ظماه

ونتي ونة خلوجٍ ولدها مابعد جدل

تشرف المرقاب للذود وتعود وراه ..!!
:
:
:
وتقول أيضاً :

ياحن قلبي حن (( ماكٍ )) مع الطلعات

ليا عشقه بالعايدي والدبل جره

جرمة ثقيل وحملوا فوقه البيبات

ويدعس عليه ببنزينه ولا سره

انا دمع عيني بالدقايق وبالساعات

ولا هي على فرقا المحبين مستره

هواجيس قلبي كل ما أقول راحت جات

تعود علي باليوم خمسة عشر مره ...!!
والماك : هي السيارة الكبيره ..
:
:
:
وقالت في الفراق :

ياجماعة وإن عزمتوا على أنكم راحلين

غمغموني عن مظاهيركم لاشوفها

كن في قلبي لهب نار ربعٍ نازلين

اشعلوها بالخلا والهبوب تلوفها

ول عودٍ لاش رحمه ولا قلبٍ يلين

عسى ذودك في نحر قومٍ وانت تشوفها

عيدوا بي في الخلا والفريق معيدين

كل عذرا نقشت بالخضاب كفوفها

مايقرب دارهم كود صنع الذاهبين

كود حمرا عزمها من صفاة بلوفها ..
وتقصد بالحمرا : السيارة ..
:
:
:
وقالت تتمنى حياة البر والبادية :

وجودي على بيت الشعر عقب بيت الطين

وجودي على شوف المغاتير منثره

وجودي على خوة هل الموتر المقفين

وجودي على شوف السهل من ورا الحره

ليا حلوا البدوان وصاروا على بيتين

ومن كان له خل مع ذاك ماغره