كل مافاضت عيوني باشة الاضلاع غنا=الموارد في الضلوع وكل ضلع فيه ونه
والتمني مايحقق هقوة القلب إن تمنا=بس قلبي مايداني تبعد الهقوات منه
ووجودي وجد من جلّي عن دياره مجنا=تو عمره عشر واربع والليالي ما تحنه
ماوراه الا عجوز واخته وعودٍ مسنا=بين فقر وبين دين وبين ضيم وبين منه
ما ذبحهم غير دمعاً من الغبينه مايكنا=ويل من سود الليالي بالمصايب يبتلنه
راح مثل الذيب اهبلته حياة الذيب ظنا=وامن والموت يومي بين مخلابه وسنه
راح ينقل دم قلبه وان ضواه الليل ونا=الذيابه مروحاته والسيوف يدورنه
لا ذكر دم القرايب عانق البيدا وثنا=وان تذكر دمعة امه زاع قلبه من مغنه
مايلوعه في حشاه الا لا شاف البرق سنا=غاب عشر سنين مابه من يرد العلم عنه
إن حداه الخوف منا هزت الاشواق منا=يوم طال الوقت عود لديار اللي ربنه
قال مادام المذله والبلاوي يبتلنا =والله ان الموت في الاوطان بين الربع جنه
يوم وقف في المنازل مالقى بيتٍ مبنا=غير بيتٍ للهبايب والذواري يلعبنه
راح يمه كنه اللي ضاربه رمحٍ مطنا=واعذابه مادرى ان سهوم بقعا يحترنه
يوم قرب سمع له صوت من العله يحنا=وحصل امه عندها ضيف يقول الموت سنه
قال يمه قالت عيوني من الدمع انعمنا=قال ابوي وقالت اطوال النصايب قد خذنه
قال واختي قالت اقفوا القوم باختك مع ضعنا=قال ربعي قالت سنين المجاعه فرقنه
قال جيتك قالت إن الموت ماأظن يتونا=واستلمها نازع الارواح روحٍ مرجهنه
ثم صاح من التفرق صيحت اللي فيه جنا=ودق صدره وانطوى من حر مابه طي شنه
كل هذا حال قلب من خلقه الله معنا=الهموم يوكلنه والروابع ياكلنه
ليه ادور للسبايب والسبب فينا ومنا=النفوس وماتسوي واليدين وما احصدنه
لا توسدنا الخطايا نلحق الشرهه زمنا=ماجزانا الا عملنا والحقايق يثبتنه
قلت اجرب وش ورانا بنتسلا وانتهنا=الليالي ماتخالف من طلب شيٍ عطنه
جاهلٍ في الغيب واثر اللي يسلينا طعنا=مادريت الا بقلبي والمحاني يردعنه
قلت وين تروح خلك في ضلوعك مرجهنا=قال مدري مير كن الحب تل العرق كنه
قلت مخطي قال ليه ليا ذكرناه اشتحنا=وانتبهت وطاح فكري للطواري واخلفنه
رحت ابسأل بنت حواء ليت حنا ماسألنا=كان والله مستريح ومخلفٍ قلبي وظنه
قلت هز العود صفق النود قال النود حنا= ماذكر به عود الا والهبايب يطرقنه
قلت في دارك غريب وقال حول في وطنا=لك محلٍ فيه قصور له سيوف يحتمنه
قلت اهلنا قال والله مانعيب سلوم اهلنا=والعفيف من الهوا مابه علوم يحرمنه
وابتدينا قصة السبع العجاف ومللنا=كل عام يمر يعطينا من اللوعات فنه
وافترقنا ما لقينا من يرد العلم عنا=غير حبٍ للهبايب والذواري يلعبنه

كل ما فاضت عيوني نجر ابـن حربـان دنّـا=في ضلوعي يسمع اللـي مـن ورا بغـداد دنّـه
يوم ابن مدعث لنا سـن الوجـود الحـق سنّـا=وا فوادي كن دود الارض يرعـى فـي مسنّـه
وا فوادي لو تضنّـى يابـن مدعـث ماتضنّـى=كنّّـه المجـدور عقـب الجـور مرمـيٍٍّ بعنّـه
اشعل التنبـاك مـن خلقتـه مـا شبّـه وكنّـا=مير كنّّه من عجاج فـاح مـن صـدره يكنّـه
وا وجودي وجد منهو عـض بابهامـه وحنّـا=واحدٍٍ شـاف الثـلاث البيـض سـودٍ مستجنّـه
شـاف قـدّام الخيـام خشيـف ريـمٍ مرجهنّـا=وثوّر البندق يبي صيـده وراغ الخشـف عنّـه
اطلق اربع عقبها اربع ثم سمـع صـوةٍ يونـا=واثرها امه صابها طلقه و طـار العقـل منّـه
واتهمـوه بذبحـة امـه ليلـة العيـد وتجـنّـا=اتهمته النـاس و صـدوف المقاديـر اتهمنّـه
قالوا اخوانه تـرا منّـا بمنـك ولا انـت منّـا=يفرق الله بيننا و بينـك عسـى مالـك مظنّـه
لك ثلاث ايام من ذلحين و ارحـل مـن وطنّـا=عقبها تخطر على راسـك مضاريـب الاسنّـه
ودّع مريتـه وتـو بنتـه صغيـره مـا تحنّـا=توها ام اربع شهـور و فـي لحمهـا زودلنّـه
ركب غوجه و انقلـب قبلـه بليـلٍ مـا تونّـا=والحمايا مـن خلافـه ارخـوا حبـال الاعنّـه
المطايـا و السبايـا مـن خـلافـه عمـدنّـا=والمنايـا سـجـدٍ قــدام عيـنـه يحتـرنّـه
كل ما عنّز علـى قـومٍ وطـن الـراس طنّـا=قالوا اذلف ذابح امـه لعـن ابونـا لـو نحنّـه
ذابـح امـه لـو زبنّـا عـدّه انّـه مـا زبنّـا=لعن ابـوك بيـوت قـومٍ ذابـح امـه زبننّـه
الجمالـه مـا تجمـل فـي ولـد حـرٍ تدنّـا=ميـر دوّرغيرنـا وانحـش بقلبـك لا ندنّـه
وانقلب من عندهـم كنّـه علـى محمـاس بنّـا=يمة اهل الغوص عجـلات الركايـب وجهنّـه
ركب بابور البحـر و دمـوع عينـه يذرفنّـا=فـوق خـدّه كنّـهـن اذواد بــدوٍ مرثعـنّـه
يـوم حـل الليـل اشرعـة السفينـه دودلـنّـا=و الهبايـب مـا يخلـن محبـلٍ مـا دودلـنّـه
قام ربّـان السفينـه قـال يـا نـاس امتحنّـا=قوموا ادعوا ربكم عـلاّم مـا وسـط الاجنّـه
قـال شيـخٍ منهـم الا عنـدي الـراي المطنّـا=ضحّوا بواحد عسـى الله ينقـذ ايديـنٍ رجنّـه
و طاحت القرعه على اللي ذابح امّـه مـا تتنّـا=ثم رموا بـه فـي ظلمـات البحـور المستكنّـه
و ادبحوا عنّه وهـو فـي غبّـة المـوج يتثنّـا=ثم عرض له من وحوش القرش جرجورٍ و صنّه
عض جرجور البحر ساقه و صايح و استجنّـا=ابك لولا الله كـلاه القـرش مـا يسلـم مطنّـه
وفي ديارٍ من بلاد الهنـد بيـن انـسٍ و جنّـا=من فضل ربي عليه اطراف الامـواج احذفنّـه
ومثل ما قبل امـس متهـومٍ بذبـح امـه معنّـا=اتهمـوه بذبـح سلطـان الـبـلاد المطمئـنّـه
و في السجون المظلمه خمسة عشر عامٍ قضنّـا=مع ثلاث ما قضـنّ الا عقـب حالـه قضنّـه
لا سمع ورقـا تغنّـي جـر مسحوبـه و غنّـا=وكل مغنى يزعجه غصـبٍ يجـي تاليـه ونّـه
ولا طرته بيـوت قـومٍ فـي الخلايـا يرفعنّـا=دار دولاب الدبـا الدالـوب دولابـه وزنّــه
وكل ما برقٍ سرى شرقٍ صدوق الغيـث شنّـا=كن قلبـه فـوق سبـق طيـور بـرٍ شطرنّـه
عقـب مـدّه جـاه مــن داره نذيرٍمرثعـنّـا=قـال انـا جيتـك بعلـمٍ والله انّـه والله انّــه
حرمتك ماتت لها عشـر سنـواتٍ قـد مظنّـا=و البنيّه معمـسٍ تقـرع عليـك قـراع شنّـه
عمّها عزّر بهـا فـي وسـط بيتـه مـا تهنّـا=خادمـة نسوانـه الثنتيـن و اللـي ضيفـنّـه
ثم زوّجهـا لبـو سبعيـن عـامٍ مـا انقصنّـا=شايبٍ يطرب خفوقـه لا سمـع للقـرش رنّـه
يوم سمع هروجهم فاضـت عيونـه و ازحرنّـا=وسط سجنه كنّّه اللـي ساكـنٍ لـه فـي مجنّـه
قال يا ربعي افزعوا لي مـن سجـونٍ غيضنّـا=و قبر قلبـي الدمـدم آغـادي يديكـم يظهرنّـه
قالوا انّـا وش لنـا انّـا والله انـه مـا شحنّـا=غير بنتك ولا مثلك مـا قربـه بقـرب جنّـه
وانتحـوا وعيـون قايدهـم جنـوبٍ خايلـنّـا=وهو ورا سجنـه عيونـه كـل نجـمٍ خايلنّـه
وعقب عامٍ من مجي ربعه و سنٍ عـض سنّـا=اعفوا الكفّـار عنّـه مـن عقـب سـودٍ دهنّـه
يوم فكوا قيـد رجلـه وانطلـق خاطـره منّـا=و انفلت يبغى ديـارٍ مـن ورا نجـد اشحننّـه
حث ساقـه مـا يشـوف الا بنيتـه يـوم قنّـا=من عقب عشرين عامٍ في وطـن قـومٍ مصنّـه
ومن ردى حظه نهار اغضن عيونـه وارقدنّـا=فز من نومه عقـب عضّـه حنـش دابٍ بسنّـه
ومن اثر سم الحنش يونـس ضلوعـه يطبخنّـا=و طاح عزّي لواحـدٍ سـود الافاعـي طيحنّـه
يـوم اهـو فكّـر ولا فوقـه نجـومٍ يبرقـنّـا=وشاف بكيـة بنتـه اللـي جـا يبيهـا بينهنّـه
قال يا نجوم السما تكفين روحي صـوب اهلنـا=علمي بنتي عن اللي صـاب ابوهـا واستسنّـه
اشهد انّا مـا بحلنـا فـي الليالـي اشهـد انّـا=مير حظي خانّي ثم مـات مـا بـه مـن يقنّـه
ذاك وجده وجد حالي فـي وطنّـا مـن عطنّـا=من هنوفٍ خدرهـا بيـض الهنـادي يحتمنّـه