عسى السحاب الى ورا النّير له ضوح=لارنّ رعاده وهبّت له الريح
يمطر على دار محاذلها صوح=غرب وهي شرق عن ام المراويح
يما وقف في جالها كل ممدوح=مدهال سمحين الوجيه المفاليح
بوادي ليا سالت مغانيه له نوح=بالعشب والقيصوم والرمث والشيح
يرعاه في ما فات ثبتان وطلوح=وبرقا متيهة البكار المواضيح
اخذت فيها سجّة تنعش الروح=مرباع ماجافى عروضه سواميح
وين انت عن عدلات الايام ياللُّوح=هذا الصلاح ولا يبي زود تصليح
أبطا عسى ما جاه عارض وساموح=ايام خبرى ماهنا الا التمازيح
العذر ما من عذر والدرب مفتوح=على الفروت مبعّدات المصابيح
لعاد لك بيت وبنت ومصلوح=بين الهضيب وبين سمر اللحاليح
فان كنت للدنيا امشيح ومشفوح=فاجمع ولاعمّك على المال بشحيح
قدام احدّر باين منك منضوح=تعطى عن المحدار صده وتصفيح
لو ان لك سبار وعيون وشبوح=تعرف دروب الناس وقت المراويح
والله لحسدك حسد مزحم لمسروح=لو انت خاويت الحرار الذوابيح
عياك قلبك في هوى كل مملوح=وانت الذي داويت جرحك بتجريح
حمل الشطط عنّى من العام مطروح=باسباب كساب الثنا والتماديح
مهو بيكرهني الى قلت باروح=يعطي وراحقي زياده وترجيح
انا رخيّ البال والصدر مشروح=مازال حي مرذى الفطر الفيح

يا هند حبك شغف القلب تشغيف=وطوّح بعيداً بالصبر عنك يا هند
يا هند في روض القطا ريحة الكيف=الى مزج ريح النفل ريحة الجعد
نحيا على ريحه ولو في لظى الصيف=من دون ريحه يا سعد ريحة الورد
ايام مرت يا سعد مرت الطيف=ونا برجوا وعد ملفوفة القد
اخلافها وعدى تقل طعنة السيف=واوفايها بالوعد احلى من الشهد
الله يا يوم قضيناه بالخيف=لو ما قفاه من الغضي موجع الصد
يا زين مافي الحب يا زين تكليف=وظنى بملهوف الحشا يعرف القصد
لولاك ما دسنا على حافة الهيف=ولا رضينا منك يا زين بالبعد
يا هند قلبي فيك ما يعرف الزّيف=والجفن من عقب الجفا رافق السهد