|
علي ، ومقبل ، وخلف ، وعبدالله (( مساجلة )) من البيانات التي كادت أن تضيع مجاراة رائعة من الشاعرين مقبل بن نمران وخلف بن عتاق للشاعر على الجضعان ، وكان لي شرف المشاركة معهما . قال : علي الجضعان
ليه ماتسأل عن اللي ميـتٍ فيـك=ياوليف الروح وش صار وجـرى مـن يـرد القلـب يومنـه يبيـك=بـس يـرجـع بذكريـاتـه ورى كان قلبك نسـى قلبـي مانسيـك=من عذاب الصد طيـرت الكـرى ليـت للحـب قاضـي واشتكيـك=واستمـع للشيـخ لامنـه قــرى ياجميل الكون عمري فـي يديـك=جرٍحه واحكم على مانتـه تـرى طاعتي عمياء ولومـي مايجيـك=والهـواوي لا يشـوف ولا يـرى وش تبي زودٍ على انك صرت بيك=والمولع في دجـى ليلـك سـرى وكان صابك شك من حبـي اليـك=والله ان القلـب لعيونـك شـرى وكان قصدك بعد والخالق لجيـك=لو بدون ازفلت والطلعـه كـرى فكانت المجاراة التالية من عقيد الشعر : مقبل النمران
ليه غائب والرجاء فيك وعليـك=تحسب إن البعد ماسـل وبـرى حالي اللي قبل تكبـر تهتويـك=يوم لعبك بيننـا بيـت وثـرى كم ضميت وقلت ما ضن أرتويك=وكم سقيت القلب لين إنه ضرى يوم يالمجمول لا خفت أحتميك=اليدين أسـوار والخافـق ذرى لين زاد العمر وارخصت الشريك=كل حاسد بالبلد شـاف ودرى كل يوم اشـد كفـي وأحتريـك=بالمكان اللي مـن الدكـه ورى اتلفـت للهبائـب وأنتشـيـك=والولد والشيخ والشائـب زرى وقام شاعر في مضامينه يحيك=وإسترد الحلـم للريـم وطـرى آه ياعلي الذنوب اللـي تليـك=قافك اللي غاص بالقلب وفـرى والسموحه مني اصلاً لو تجيك=مامحت ذنبك ولا جرحي بـرى وكانت مجاراة أخرى رائعة من : خلف الفريد
ما يجيك الشر علـي مايجيـك=عسى من يجفيك ما يلقى عرى اصطبر ياخوك ماظنك دريـك=هذا لذع الحب مثل الكسبـرى يبرّكن البيض عاشقهن بريـك=والقليب الغض يغرّنّـه غـرى بالعيون السود واللباس الشيك=افلسن جيوب واهفن اومـرى وهذا ابن نمران بالخط السميك=يشتكي محبوب باعه واشترى اعلـن المكنـون الله يهديـك=من يرد السيـل وان تحـدرى اللسان حصان والقصه دميـك=والشهود كثار والساري سرى وكان لي شرف المجاراة لهؤلاء الكبار عبدالله بن غنام
يا علي لا تنعي النعي الركيك = يوم ذاك الخل بالغ وافترى وشفك الصارخ على اللي مايبيك = وبوحك الفاضح على الناس جهرا ومشيك الحافي على الدرب الشويك = للخليل اللي يبيعك ما شرى ما رضيته لك وانا دونك عليك = والله أن حالي على حالك ذرا والله أني لك على أشجانك شريك = لين هم الروح يرجع قهقرا دوك مني ما تبي منك والليك = دون عز النفس ما نلقى عرى راس مالي دونه الدرك الدريك = لو رياح الكون تذرانا ذرا ولا ورانا من الحسايف ما يجيك = دام راس المال ما جاه خشرا كم نشوم بعز وضلوع دكيك = ومع جروح الروح ما ننظر ورا بقي أن نسجل هنا تاريخ هذه المساجلة ، وهذا ما ينقصني ، فأنا لا أذكر التاريخ بالضبط لكن لعل الأخوة يفيدوننا في هذا . |
رد: علي ، ومقبل ، وخلف ، وعبدالله (( مساجلة )) اقتباس:
ابو عزام لاهنت على الاعاده ، ولكني ايضاً لا أتذكر التاريخ !!!!!! اشكرك على الجهد لاهنت ---------- |
رد: علي ، ومقبل ، وخلف ، وعبدالله (( مساجلة )) ابو عبدالعزيز شكراً جزيلاً على التنويه ، واعتذر عن الخطأ. اما بالنسبة للتاريخ أنا أعتقد أنها بحدود شهر شوال تقريباً |
رد: علي ، ومقبل ، وخلف ، وعبدالله (( مساجلة )) لله دركم جميعاً وان فخور اني قدرت أحرك غرائزكم ولتشدو بأجمل غزل عذري عفيف وخصوصاً عبدالله غنام ردك في غاية الروعه والجمال خربت علينا وخصوصا انا شيبنا القافيه عليك القافيه صعبه واخذنا لبها ولكن مثل الشاعر عبدالله ماتصعب عليه نظمت فأجدت شاعر متمكن اما تاريخها اذا لم تخوني الذاكره فهي في شهر رجب1428 أشكركم جميعاً على المجاراه |
رد: علي ، ومقبل ، وخلف ، وعبدالله (( مساجلة )) كفو كفو كفو كفو كفو كفو كفو كفو كفو كفو يعني ابصم بالعشره بيض الله وجهك ابو عزام ومن اجمل الروائع واتمنى الدوائم على هالمنوال وكل شهر يتحفونا بمثل هالروائع صح السانكم ولاهنتم |
رد: علي ، ومقبل ، وخلف ، وعبدالله (( مساجلة )) يعطيكم العافية كلكم مافيكم حيلة وبيض الله وجيهكم |
رد: علي ، ومقبل ، وخلف ، وعبدالله (( مساجلة )) الشاعر علي الجضعان ، والشاعر مقبل بن نمران ، والشاعر خلف الفريدي ، والشاعر عبدالله بن غنام0000 قصائد جزله من شعار جزلين بيض الله وجيهكم جميعً |
رد: علي ، ومقبل ، وخلف ، وعبدالله (( مساجلة )) رااااائع جداً استمتعنا كثيراً نفخر بكم لاعدمناكم تقبلوا تحياتي وتقديري لكم كل شخص باسمه |
رد: علي ، ومقبل ، وخلف ، وعبدالله (( مساجلة )) أخي / على الجضعان ... رومانسي ونظرات بالطيف
ياجميل الكون عمري فـي يديـك = جرٍحه واحكم على مانتـه تـرى طاعتي عمياء ولومـي مايجيـك = والهواوي لا يشـوف ولا يـرى الأخ/ مقبل النمران ... صائد الغيد عذب الأختيار
كل يوم اشـد كفـي وأحتريـك = بالمكان اللي مـن الدكـه ورى اتلفـت للهبائـب وأنتشـيـك = والولد والشيخ والشائـب زرى الأخ/ خلف العتاق الفريد... أبا عبدالعزيز الصعود لقمة الجبل والنظر للبساتين الوارفه الجميله .. ترد الروح وابياتك تغذي الروح وتردالروح
يبرّكن البيض عاشقهن بريـك = والقليب الغض يغرّنّـه غـرى بالعيون السود واللباس الشيك = افلسن جيوب واهفن اومـرى الأخ/ عبدالله غنام ... كمال الجمال مستحيل ولكنك بهذا المقام قاربت إكمال الجمال اليوسفي جميله هذه الأبيات بكل ما تحمله الكلمه من معنى
وشفك الصارخ على اللي مايبيـك = وبوحك الفاضح على الناس جهرا ومشيك الحافي على الدرب الشويك = للخليل اللـي يبيعـك مـا شـرى ما رضيته لك وانا دونـك عليـك = والله أن حالـي علـى حالـك ذرا شكـــــــــــــــــراً لكم شعرائنا الأفاضل على هذه التحفه الأنيقه |
| الساعة الآن 09:24 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO TranZ By
Almuhajir